баңладишта 19 милйондин артуқ балиниң келәчики хәтәр астида
б д т балилар фонди (UNICEF) баңладишта килимат өзгиришигә мунасивәтлик тәбиий апәтниң 19 милйондин артуқ балиниң һайатиға вә келәчикигә хәтәрлик тәсир көрситидиғанлиқи тоғрисида агаландурди.
түркийә авази радийоси хәвири: б д т балилар фонди баңладиштики килимат өзгиришигә мунасивәтлик тәбиий апәтниң 19 милйондин артуқ балиниң һайати вә келәчикигә тәсир көрситидиғанлиқини агаһландурған доклат елан қилди.
доклатта көрситилишичә, килимат өзгиришигә мунасивәтлик су апәтлири, сиклон вә башқа муһит характерлик апәтләрниң тәсири сәвәбидин 19 милйондин артуқ балиниң һайати вә келәчики хәтәр астида икән.
доклатта, йуқиридики санлиқ мәлуматларға, бирмадин қечип баңладиштики шараити начар лагерларда туруватқан йүз миңларчә араканлиқ мусулман балилириниңму киргүзүлгәнлики әскәртилди.
доклатта, баңладиш миқйасида аилиләрниң, деһқанчилиқ етизлириниң шорлишиши, су апәтлири йаки еқин сулириниң азийиши сәвәбидин йезилардики һайатлиқ мәнбәлиридин айрилип чоң шәһәрләргә көчүватқанлиқи, нурғун балиларниң һайатта қелиш үчүн кичик йашта ишләшкә, өйлинишкә йаки һәр хил әткәсчиликкә мәҗбурлиниватқанлиқи алаһидә қәйт қилинди.
б д т балилар фондиниң даккадики байанатчиси җен җәквес симон (Jean-Jacques Simon) бирләшмә агентлиқ (AP) қа бәргән байанатида, тәхминән 12 милйондин артуқ балиниң су ташқини йүз беридиған дәрйа бойлири әтрапида, 3 милйон балиниң қурғақчилиқниң тәсиригә учриған йеза игилики районлирида йашайдиғанлиқини билдүрди.
доклатта билдүрүлишичә, шараити начар лагерларда йашаватқан тәхминән йерим милйондин артуқ араканлиқ бала вә башқа 4 йерим милйондин артуқ бала сиклон күчлүк тәсир көрситиватқан йеза районлирида йашайдикән.
