б д т: венезуела киризиси бир милйондин артуқ кичик балиға тәсир көрситиду
бирләшкән дөләтләр тәшкилати (б д т) балилар параванлиқ фонди, венезуеладики киризисниң тәсиригә учриған инсаний йардәмгә моһтаҗ балиларниң саниниң 1 милйон 100 миңға йетишиниң күтүлүватқанлиқини билдүрди.
түркийә авази радийоси хәвири: б д т балилар параванлиқ фондиниң бу һәқтики байанатида, венезуелада давамлишиватқан киризисниң балиларға көрсәткән тәсири тоғрисидики учурларға орун берилди.
байанатта, венезуелада йүз бәргән киризисниң зийанкәшликигә учриған балилар саниниң икки һәссә көпийип кетишиниң күтүлүватқанлиқи тәкитлинип, қошна дөләтләргә кәткәнләрни қошқанда 1 милйон 100 миң балиниң қоғдинишқа вә йардәмкә моһтаҗ болидиғанлиқи қәйт қилинди.
биразилийә, коломбийә, екватор вә гуйанаға охшаш район дөләтлиридики 4 милйон 900 миң венезуелалиқниңму инсаний йардәмгә һаҗити чүшидиғанлиқи әскәртилгән байанатта, район дөләтлири балилар, көчмәнләр вә мусапирларниң асаслиқ еһтийаҗлирини қамдашқа чақирилди.
бирләшкән дөләтләр тәшкилати (б д т) доклатиға қариғанда, венезуела нопусиниң төттин биригә йеқинини тәшкил қилдиған 7 милйон адәм инсаний йардәмгә моһтаҗ икән.
венезуела пирезиденти неколас мадуро, дөлитидики киризисниң җавабкариниң америка қошма иштатлири вә у йүргүзүватқан ембарголар икәнликини илгири сүрмәктә.
йәнә бир тәрәптин, б д т хәвпсизлик кеңишиниң америкиниң тәлипигә асасән алдимиздики һәптә йиғини чақирип, венезуеладики инсаний киризисқа алақидар мәсилиләрни музакирә қилиши күтүлмәктә.
венезуеладики сийасий киризис, көп санлиқи өктичиләрниң қолидики венезуела миллий мәҗлисниң башлиқи хуән гуайдониң, өктичиләрниң йиғилишида өзини «мувәққәт пирезидент» дәп елан қилиши билән башланғаниди.
арқидин башта америка қошма иштатлири болуп австралийә, канада, коломбийә, перу, еквадор, парагвай, биразилийә, чили, панама, аргентина, коста рика вә гиватемалаға охшаш дөләтләр тәрипидин етирап қилинғаниди, арқидин йавропа парламентиму бу йөнилиштә қәдәм ташлиғаниди.
түркийә, мексика, русийә, куба, хитай вә боливийә болса, венезуела пирезиденти неколас мадуро һөкүмитини қоллайдиғанлиқини билдүргән, мадурому өзгиришләрдин кейин америка қошма иштатлири билән дипломатик вә сийасий мунасивәтләрни үзүп ташлиғанлиқини, бирақ сода мунасивәтлириниң давамлишидиғанлиқини уқтурғаниди.
