трамп мон җаин билән көрүшиду
америка қошма иштатлири пирезиденти доналд трамп 11 апрел күни ақсарайда җәнубий кореийә пирезиденти мон җаин билән көрүшиду.
түркийә авази радийоси хәвири: ақсарай ахбарат васитилири байанат ишлири ишханиси тәрипидин бу һәқтә елан қилинған йазма байанатта, 11 – апрел күни ақсарайда ишқа ашурулидиған учришишта, америка – җәнубий корейә мунасивәтлиридин сирт йәнә, болупму шималий корейәдики өзгиришләр һәққидә кәң даирилик музакирә елип берилидиғанлиқи қәйт қилинди.
икки дөләт оттурисидики иттипақдашлиқ мунасивәтлириниң наһайити күчлүк икәнлики тәкитләнгән байанатта, мон җаинниң зийаритиниң америка – җәнубий корейә мунасивәтлириниң йәниму күчийишидә түрткилик рол ойнайдиғанлиқи қәйт қилинди.
америка қошма иштатлири пирезиденти доналд трамп билән шималий корейә рәһбири ким җоңунниң вейтнамниң пайтәхти ханойда 27 – 28 – феврал күни ишқа ашурулған иккинчи қетимлиқ учришишидин һечқандақ нәтиҗә чиқмиғаниди.
трамп ким җоңун билән елип барған учришишидин кейин елан қилған байанатида, «шималий корейә рәһбәрлири ембарголарниң пүтүнләй бикар қилинишини тәләп қилди, һалбуки, бизниң бундақ қилиш нийитимиз йоқ иди, шуңа келшәлмидуқ» дегәниди.
шималий корейә ташқи ишлар министири ри йоңхо учришишта ембарголарниң қисмән бикар қилинишини тәләп қилғанлиқлирини ейтқаниди.
америка қошма иштатлири ташқи ишлар министири майк помпейо болса, шималий корейә билән өткүзүлүватқан сөһбәтниң давамлишидиғанлиқини әскәрткәниди.
