keshmirdiki puqralar bixeter jaygha yötkeldi
pakistan bilen hindistan otturisida jiddiychiliklerni keltürüp chiqarghan keshmir kontrol linyesi etrapidiki étishishlar sewebidin xeter astida qalghan puqralar, bixeter jaylargha orunlashturuldi.
türkiye awazi radiyosi xewiri: keshmirni bölüp turidighan kontrol linyesining pakistangha tewe azad keshmir rayonida 200 ge yéqin aile, toqunush siziqidiki öyliridin tarqaqlashturulup, hökümet tesis qilghan üch panahlinish ornigha orunlashturuldi.
pakistan hökümet mesuli muazzam zafer hawa bombardimanliri we top oqlirining tehditi astida qalghan aililerning üch panahlinish binasigha toplanghanliqini, aililerge yémek-ichmek we dawalinish jehettin yardem qilinghanliqini bildürdi.
hindistan bilen pakistan otturisidiki jiddiychlik, 2019-yil 14-féwral (peyshenbe) keshmirning hindistangha tewe qismida qoralliq saqchi qismigha qilinghan we 44 kishi jénidin ayrilghan bomba hujumi bilen bashlanghan idi.
hindistan hökümiti pakistanni hujum weqesini peyda qilghan térroristlarni qollash bilen eyibligen؛ pakistan bolsa, hujumni eyibligen, emma hindistanning eyiblishini ret qilghan idi.
hindistan 2019-yil 26-féwral (seyshenbe) keshmir kontrol linyesining pakistan tewelikidiki térrorluq nishanlirini hawadin bombardiman qilghanliqini élan qildi.
pakistan bolsa, hawa tewelikige xilapliq qilghanliqini seweb körsitip, hindistanning ikki ayropilanini étip chüshürgenlikini bildürdi.
hindistanmu pakistanning bir ayropilanini étip chüshürgenlikini élan qildi, biraq pakistan hökümiti buni toghrilimidi. pakistan hökümiti bilen armiyesi jiddiychilikning yuqiri örlishini xalimaydighanliqini bildürdi. hindistan bash ministiri modi bolsa, pakistanni hindistanni muqimsizlashturushqa urunush bilen eyiblidi.
türkiye, yawropa ittipaqi, gérmaniye, engliye, xitay we rusiye tereplerni soghuqqan bolushqa chaqirdi.
