венезуеланиң костарика әлчиханиси өктичиләрниң қолиға өтүп кәтти

түркийә авази радийоси хәвири: венезуеланиң костарикада турушлуқ әлчиханиси өктичиләр тәрипидин тәйинләнгәнлики илгири сүрүлгән баш әлчиниң контироллуқиға өтүп кәтти.

венезуела ташқи ишлар министири йорге арреза бир гуруппа йат кишиләрниң оғридәкла әлчиханиға бесип киргәнликини ейтти.

алдинқи ай өзини венезуеланиң вақитлиқ пирезиденти елан қилған йуан гуайдо тәрипидин баш әлчиликкә тәйинләнгәнликини тилға алған марийа фарийа түнүгүн әтигәндә костариканиң пайтәхти сан җоста турушлуқ венезуела әлчиханисиға кирди.

марийа фарийа венезуела пирезиденти николас мадуро тәрипидин тәйинләнгән дипломатийә хадимлириниң вәзиписидин елип ташланғанлиқини вә коста рика һөкүмитиниңму өзини қоллиғанлиқини илгири сүрди.

венезуела ташқи ишлар министири йорге арреза бу әһвалға қарита иҗтимаий таратқу һесабидин қайтурған инкасида наразилиқ билдүрүп, «бүгүн әтигән бир гуруппа йат кишиләр оғирдәкла венезуеланиң костарикадики әлчихана бинасиға усуп кирди» деди вә коста рика һөкүмитиниң дипломатик мунасивәтләргә даир вийана әһдинамисигә бинаән венезуеланиң муәссисәлири вә хадимлириниң бихәтәрликини қоғдиши керәкликини тәкитлиди. 

коста рика гуайдониң вақитлиқ пирезидентлиқини қоллиған дөләтләрдин бирси болуп, 16 – февралда венезуеланиң дипломатийә хадимлириниң йил ахириғичә дөләтни ташлап чиқип кетишини тәләп қилған иди.

венезуелада асаслиқ көп қисми өктичиләрниң қолидики хәлқ парламенти башлиқи гуайдо алдинқи ай өктичиләрниң йиғилишида өзини вақитлиқ пирезидент дәп елан қилған, арқидинла америка, австиралийә, канада, коломбийә, перу, еквадор, парагвай, беразилийә, чили, полша, аргентина, костарика вә гиватемала қатарлиқ дөләтләр униң вақитлиқ пирезидентлиқини қоллиған, ахирида йавропа парламентиму қоллаш тәрәпкә қарап қәдәм ташлиған иди. 

түркийә, мексика, русийә, иран, куба, хитай вә боливийә болса, венезуела пирезиденти николас мадуро һөкүмитини қоллайдиғанлиқини тәкитлигән, мадурому бу әһваллардин кейин америка билән дипломатик вә сийасий мунасивәтлирини үзүп ташлиғанлиқини, бирақ сода мунасивәтлириниң давамлишидиғанлиқини елан қилған иди.

америка пирезиденти доналд трамп венезуелаға әскәр йоллашниңму таллашлардин бирси икәнликини ейтқан иди.