америка: ирақ тәләп қилса әскәрлиримизни чекиндүримиз

түркийә авази радийоси хәвири: америка ирақ ишлири мәслиһәтчиси җови худ ирақ пайтәхти бағдадта ахбарат елан қилиш йиғини өткүзүп, иранға йеқин шиә сийасий партийәләр оттурисида чоң талаш-тартишларға сәвәб болған американиң ирақтики әскәрлирини чекиндүрүши тоғрисида тохталди.

у америка әскәрлириниң ирақта мәркизий һөкүмәтниң чақириқиға бинаән туруватқанлиқини әскәртип: «ирақ һөкүмити тәләп қилған әһвалда, әскәрлиримиз, хәлқаралиқ бирләшмә қисим вә нато қисимлири ирақтин чекиниши мумкин» деди.

у ирақта пәқәт һәрбий мәслиһәтчиләр вә тәлим-тәрбийә бәргүчиләрниң барлиқини, америкаға тәвә һечқандақ һәрбий базиниң йоқлуқини илгири сүрди.

у ирақта вәзипә өтәватқан тәхминән 5 миң 200 америка әскириниң ирақ һәрбий қисимлири билән һәрикәт қилғанлиқини билдүрүп, ирақ қисимлириниң чәт әллик һәрбий мәслиһәтчиләрниң йардими болмиғандиму бихәтәрликни капаләткә игә қилидиған йетәрлик сәвийәгә йетәлмигәнликини илгири сүрди.

у таратқуларда елан қилиниватқан америка әскәрлириниң ирақта кеңийишкә башлиғанлиқиға мунасивәтлик хәвәрләрниң асассиз икәнликини қәйт қилди.

америка пирезиденти доналд трамп 2018-йил 26-декабир әнбардики һәрбий базини туйуқсиз зийарәт қилғанда, америка әскәрлириниң ирақтин чекинмәйдиғанлиқини елан қилған иди.

доналд трамп йәнә, кейин елан қилған байанатлирида америка әскәрлириниң ирақ-сүрийә чеграсида иранниң паалийәтлирини көзитидиғанлиқлирини тәкитлигән иди.

пирезидент доналд трампниң бу байанатидин кейин, иранға йеқин шиә рәһбәрләр американиң ирақта һәрбий җәһәттин мәвҗут болуп турушиға қаттиқ наразилиқ билдүргән иди.

америка 2003-йили ишғал қилған ирақта тәхминән 165 миң әскири күчи билән 2011-йилғичә мәвҗут болуп турған болуп, 2011-йили сабиқ пирезидент барак обаманиң буйруқи бойичә әскәрлирини ирақтин чекиндүргән иди.

америка һөкүмити 2014-йил 10-ийун террорлуқ тәшкилати даеш пәйда болғандин кейин, шу вақиттики ирақ баш министири нури әлмаликиниң чақириқи билән, қайтидин ираққа әскәр әвәткән иди.