майк пенс йавропа иттипақиға әза дөләтләрни йадро келишимидин чекинип чиқишқа чақирди

түркийә авази радийоси хәвири: америка муавин пирезиденти майк пенс, йавропа дөләтлирини 2015-йили иран билән һасил қилинған йадро келишимидин чекинип чиқишқа чақирди.

полшада америка башчилиқида чақирилған «оттура шәрқниң нөвәттики вәзийити»намлиқ йиғинға қатнашқан пенс, ирандин нефит сетивелишни азайтип американиң иранға қаратқан ембаргосиға риайә қилип кәлгән дөләтләрни махташ билән биргә, бәзи йавропа дөләтлирини америка ембаргосиға әһмийәт бәрмәслик билән тәнқид қилди.

пенс мундақ деди: «әпсус йавропадики бәзи ғол иттипақдашлиримиз бу  ишта бизгә қәтий маслашмиди,һәтта ембарголиримизға зит бәзи миханизмларни қуруп чиқишқа башчилиқ қилди. бу әһвал иранғила пайдилиқ, йавропа иттипақиға болса зийанлиқ, шундақла йавропа билән америка оттурисидики мусапини техиму ечиветиду. »

йавропа иттипақини 2015-йили түзүлгән йадро келишимидин чекинип чиқишқа чақирған пенс: йавропалиқ иттипақдашлиримизниң әйни чағда иран билән һасил қилинған йадро келишимидин чекинип чиқидиған вақти йетип кәлди, иран хәлқигә, районға вә дунйаға әркинлик, тинчлиқ вә аманлиқ келиш үчүн, иран һөкүмитигә тегишлик дипломатик вә иқтисадий бесимни йолға қойуватимиз. йавропа иттипақи бу җәһәттә бизгә маслишип бериши керәк, деди.

полша ташқи ишлар министири җейкек кзапутовикиз,  йавропа иттипақиниң нөвәттә иранниң оттура шәрқниң вәзийитини техиму қалаймиқан қиливатқанлиқи мәсилисидә америка билән охшаш қарашқа игә икәнликини, бирақ бу ишқа қарита америкадин пәрқлиқ сийасәт йолға қойушни тәшәббәс қилидиғанлиқини ейтти.

йавропада нурғун дөләт американиң бултур йадро келишимидин чекинип чиқишидин кейинму йәнила 2015-йили иран билән һасил қилинған  йадро келишимигә риайә қилип кәлмәктә.