нетанйаһу, сүрийәдин башқа райондики дөләтләр билән болған мунасивәтлиримиз «наһайити йахши» деди

түркийә авази радийоси хәвири: бунйамин нетанйаһу, 13-, 14 – февралда полшада чақирилидиған «оттура шәрқтә тинчлиқ вә хәвпсизликниң келәчикини қоллаш» темилиқ йиғинға иштирак қилиш үчүн варшаваға қарап йолға чиқиштин илгири тел авивдики бен гурион айродурумида таратқуларға байанат бәрди.

бунйамин нетанйаһу, сүрийәни һесаблимиғанда райондики башқа дөләтләр билән болған мунасивәтләрниң «наһайити йахши» икәнликини ейтти.

варшавадики йиғинниң мәркизий темисиниң иран икәнликини әскәрткән нетанйаһу, йиғинниң муһимлиқини алаһидә тәкитләп өтти.

исраилийәниң иранға қарши ташлиған қәдәмлири тоғрисида тохталған нетанйаһу, «һәрдаим иранни тохтитиш үчүн тиришиватимиз. түнүгүнниму өз ичигә алған һәркүни иран вә униң районға орунлишиш тәшәббуслириға қарши хизмәтләрни қиливатимиз» дейиш арқилиқ түнүгүнки һуҗумларниң исраилийә армийәси тәрипидин қилинғанлиқини елан қилған болди.

исраилийәдики мәһәллий мәнбәләр, түнүгүн исраилийәниң, сүрийәниң җәнубидики кунәйтра вилайитидики бәшшар әсәд һакимийити һәмдәм болуватқан һизбуллаһ нишанлириға һуҗум қилғанлиқини билдүргәниди.

исраилийә «күтүлмигән шәкилдә» бу йил сүрийәдики иран нишанлириға қарши елип берилған һавадин зәрбә бериш һәрикәтлириниң җавабкарлиқини үстигә елишқа башлиди.

исраилийә баш министири өткән ай байанат берип, 11 – йанварда дәмәшқ айродурумиға қилинған һава һуҗумини исраилийә армийәсиниң қилғанлиқини билдүргәниди.

мутәхәссисләр, нетанйаһуниң сүрийәдики иран нишанлириға қилинған һуҗумларниң җавабкарлиқини үстигә елишиниң пәрдә арқисида 9 – апрелдики муддәттин бурун өткүзүлидиған сайламниң йатидиғанлиқини қәйт қилишмақта.