хуән гуайдо пат йеқинда венезуелаға йардәм буйумлири елип келинидиғанлиқини билдүрди

түркийә авази радийоси хәвири: венезуелада өзини мувәққәт пирезидент елан қилған хуән гуайдо, һөкүмәт наразилиқ билдүргән тәқдирдиму 23-февралда дөләт ичигә йардәм буйумлири киридиғанлиқини ейтти.

тәхминән50 дөләт тәрипидин мувәққәт пирезидент салаһийитидә етирап қилинған гуайдо, пайтәхт каракаста кәң көләмлик намайиш өткүзди.

армийәгә «йардәм буйумлириниң киришигә рухсәт қилип бесимни түгәткин»дәп йолйуруқ чүшүргән гуайдо: йардәм буйумлири кирмигән тәқдирдә тәхминән 300миң венезуелалиқ өлүп кетиду, униң үстигә 2 милйондәк кишиниң саламәтлик әһвали йахши әмәс, деди.

йардәм буйумлириниң 23-февралда венезуелаға елип келинидиғанлиқини ейтқан гуайдо, йардәм буйумлирини тапшуруп елиш вә тарқитиш хизмәтлириниң орунлаштурулғанлиқини билдүрди.

йардәм буйумлириниң венезуелаға чоқум елип келинидиғанлиқини әскәрткән өктичи партийә рәһбири гуайдо, пирезидент николас мадурониң дөләтни ташлап кетишкә мәҗбур болидиғанлиқини илгири сүрди.

венезуелада өктичи партийә венезуеланиң омумий әһвалиниң толиму начар икәнликини илгири сүрүп, хәлқарадин келидиған йардәм буйумлириниң венезуела хәлқигә сақ-саламәт йәткүзүп берилишини тәләп қилмақта.

пирезидент николас мадуро, өктичиләрниң йардәм буйумлирини венезуелаға елип кириш чақириқлири вә тиришчанлиқлириниң «америка рәһбәрликидики ишғалийәт истратегийәсиниң бир қисми икәнликини»ейтип, «бундақ көз бойамчилиққа рухсәт қилмайдиғанлиқини»билдүрмәктә.