moro musulmanliri siyasiy teqdiri üchün saylam ötküzdi
fillipinning jenubida yashawatqan moro musulmanliri, rayonning siyasiy teqdirini özgertidighan bangsamoro organik qanuni dairiside uyushturulghan el rayini sinash paaliyitide bélet tashlidi.
türkiye awazi radiyosi xewiri: fillipinning jenubida yashawatqan moro musulmanliri, rayonning siyasiy teqdirini özgertidighan bangsamoro organik qanuni dairiside uyushturulghan el rayini sinash paaliyitining ikkinchi basquchida bélet tashlidi.
rayonning gherbiy shimaligha jaylashqan lonaw dél nortédiki 6 rayon we shimaliy kotabatodiki 67 olturaq rayonda yashawatqan saylighuchilar, lanaw dél norté we shimaliy kotabatodiki bezi olturaq rayonlirining yéngi aptonom rayongha qoshulup qoshulmaydighanliqi toghrisida awaz béridu.
fillipin saylam komitéti rayonda yashawatqan musulman, lumad, xiristiyan we yerlik xelqlerdin teshkil tapqan 640 ming saylighuchining awaz béridighanliqini uqturdi.
saylam merkezliride saet 07:00din 15:00giche bolghan ariliqta bélet tashlinidighanliqi, saylam netijilirining 4 kün ichide élan qilinidighanliqi bildürüldi.
bangsamoro organik qanuni bu yil yanwarda rayondiki 1 milyon 500 mingdin artuq moro xelqining qollap awaz bérishi netijiside maqullandi we musulmanlar olturaqlashqan mindanaw rayonida bangsamoro aptonom rayoni hökümiti quruldi.
rayonda 21-yanwarda ötküzülgen el rayini sinash paaliyitidin kéyin, lanaw dél norté we shimaliy kotabatodiki bezi olturaq rayonliriningmu yéngi qurulidighan aptonom rayongha qoshulup qoshulmaydighanliqi awazgha qoyulidu.
fillipin pirézidénti rodrigo dutérté teripidin bultur iyulda testiqlanghan bangsamoro musulmanlirini aliy aptonomiyelik hoquqlargha érishtürgen qanun, rayondiki musulmanlarni qanuniy we iqtisadiy jehettin téximu imtiyazliq orungha keltürüshni mezmun qilidu.
yéngi aptonomiyelik qanungha asasen bangsamoro aptonom hökümiti qurulidu, rayonda dini erkinlik saheside islam qanunining hökümlirini tedbiqlaydighan mehkimiler tesis qilinidu, merkizi hakimiyet mindanawdiki memuriy hoquqlirini bangsamoro hökümitige tapshurup béridu. bangsamoro rayonidiki chégralarni merkizi hakimiyet bilen aptonom rayonluq hökümet birlikte bashquridu, aptonom rayonluq hökümet énérgiye menbelirining bashqurush hoquqini üstige alidu.
sabiq moro memliketlik azadliq fironti bilen moro islamiy azadliq firontining jengchiliri saqchi qisimgha qoshulup kétidu.
