ereb ittipaqi biraziliyening elchixana yötkesh pilanining aldini tosushqa chaqirdi
ereb ittipaqi bash katipi ehmet ebu gayt biraziliyening isirailiye paytexti tél awiwdiki elchixanisini quddusqa yötkishining aldini élish üchün barliq imkaniyetlerdin paydilinishqa chaqirdi.
türkiye awazi radiyosi xewiri: ereb ittipaqi biraziliyening tél awiwdiki elchixanisini quddusqa yötkishining aldini élish toghrisida bayanat élan qildi. bu heqtiki yazma bayanatqa asaslanghanda, ereb ittipaqining bash katipi ehmet ebu gayt bilen pelestin dölet reisi mehmut abbas misir paytexti qahirede körüshken. körüshüshte, biraziliye pirézidénti jair bolsonaroning tél awiwdiki biraziliye elchixanisini quddusqa yötkesh pilani we quddusni isirailiye paytexti dep étirap qilish yoli bilen sherqiy quddusning qanuniy salahiyitige ziyan sélishni meqset qilghan heriketlirige qarshi turush ishlirini muzakire qilghan.
ereb ittipaqi bash katipi ebu gayt bu heqte toxtilip: «bu basquchta, biraziliye pirézidéntining tél awiwdiki elchixanisini quddusqa yötkesh pilanini qayta közdin kechürüshi üchün qolidiki kozirlardin paydilinishqa éhtiyajliq. ereblerning qolida yéterlik kozir bar, biraq bularning hemmisini bir yerge toplash we bir-birige maslashturush kérek. buni emelge ashurush üchün kéyinki basquchta muhim xizmetlerni ishlesh kérek» dédi.
sotsiyal libéral partiyedin biraziliyening pirézidént namzatliqigha saylanghan bolsonaro wezipisini tapshuruwalghandin kéyin, tél awiwdiki biraziliye elchixanisini quddusqa yötkesh pilanidin bésharet bergen idi.
ereb ittipaqining bu heqte élan qilinghan yene bir bayanatigha asaslanghanda, bash katip ebu gayt ottura amérikagha jaylashqan hondurasning elchixanisini quddusqa yötkesh niyitidin «intayin biaramliq hés qiliwatqanliqi» ni bildürgen.
u: «her qandaq döletning bundaq qedemni bésishqa urunushi, quddusni ishghal zémini dep qobul qilghan we pelestin-isirailiye otturisida emelge ashurulidighan muzakireler arqiliq axirqi salahiyitini békitishtin burun elchixanilarni u yerge yötkeshni chekleydighan xelqaraliq qanungha xilapliq qilish hésablinidu» dédi.
u quddusning qanuniy salahiyitige ziyan salidighan qedemlerni tashlashni oylawatqan döletlerning buni qaytidin közdin kechürüshini we bundaq qedemlerning, ereb döletliri bilen bolghan munasiwetlerge qandaq tesir körsitidighanliqini etrapliq oylishishi kéreklikini qeyt qildi.
isirailiye bash ministiri nétanyahu 2-yanwar biraziliyede amérika tashqi ishlar ministiri pompéyo we honduras pirézidénti juan orlando hérnandéz bilen körüshkende, hondurasning tél awiw elchixanisini quddusqa yötkesh mesilisini muzakire qilghan idi.
bügüngiche amérika bilen giwatémala tél awiwdiki elchixanisini quddusqa yötkidi. paragwaymu bu toghrida qarar chiqardi, biraq hökümet almashqanliqi seweblik qarar emeldin qalduruldi.
