әрәб иттипақи биразилийәниң әлчихана йөткәш пиланиниң алдини тосушқа чақирди

түркийә авази радийоси хәвири:  әрәб иттипақи биразилийәниң тел авивдики әлчиханисини қуддусқа йөткишиниң алдини елиш тоғрисида байанат елан қилди. бу һәқтики йазма байанатқа асасланғанда, әрәб иттипақиниң баш катипи әһмәт әбу гайт билән пәләстин дөләт рәиси мәһмут аббас мисир пайтәхти қаһирәдә көрүшкән. көрүшүштә, биразилийә пирезиденти җаир болсонарониң тел авивдики биразилийә әлчиханисини қуддусқа йөткәш пилани вә қуддусни исираилийә пайтәхти дәп етирап қилиш йоли билән шәрқий қуддусниң қануний салаһийитигә зийан селишни мәқсәт қилған һәрикәтлиригә қарши туруш ишлирини музакирә қилған.

әрәб иттипақи баш катипи әбу гайт бу һәқтә тохтилип: «бу басқучта, биразилийә пирезидентиниң тел авивдики әлчиханисини қуддусқа йөткәш пиланини қайта көздин кәчүрүши үчүн қолидики козирлардин пайдилинишқа еһтийаҗлиқ. әрәбләрниң қолида йетәрлик козир бар, бирақ буларниң һәммисини бир йәргә топлаш вә бир-биригә маслаштуруш керәк. буни әмәлгә ашуруш үчүн кейинки басқучта муһим хизмәтләрни ишләш керәк» деди.

сотсийал либерал партийәдин биразилийәниң пирезидент намзатлиқиға сайланған болсонаро вәзиписини тапшурувалғандин кейин, тел авивдики биразилийә әлчиханисини қуддусқа йөткәш пиланидин бешарәт бәргән иди.

әрәб иттипақиниң бу һәқтә елан қилинған йәнә бир байанатиға асасланғанда, баш катип әбу гайт оттура америкаға җайлашқан һондурасниң әлчиханисини қуддусқа йөткәш нийитидин «интайин биарамлиқ һес қиливатқанлиқи» ни билдүргән.

у: «һәр қандақ дөләтниң бундақ қәдәмни бесишқа урунуши, қуддусни ишғал земини дәп қобул қилған вә пәләстин-исираилийә оттурисида әмәлгә ашурулидиған музакирәләр арқилиқ ахирқи салаһийитини бекитиштин бурун әлчиханиларни у йәргә йөткәшни чәкләйдиған хәлқаралиқ қанунға хилаплиқ қилиш һесаблиниду» деди.

у қуддусниң қануний салаһийитигә зийан салидиған қәдәмләрни ташлашни ойлаватқан дөләтләрниң буни қайтидин көздин кәчүрүшини вә бундақ қәдәмләрниң, әрәб дөләтлири билән болған мунасивәтләргә қандақ тәсир көрситидиғанлиқини әтраплиқ ойлишиши керәкликини қәйт қилди.

исираилийә баш министири нетанйаһу 2-йанвар биразилийәдә америка ташқи ишлар министири помпейо вә һондурас пирезиденти җуан орландо һернандез билән көрүшкәндә, һондурасниң тел авив әлчиханисини қуддусқа йөткәш мәсилисини музакирә қилған иди.

бүгүнгичә америка билән гиватемала тел авивдики әлчиханисини қуддусқа йөткиди. парагвайму бу тоғрида қарар чиқарди, бирақ һөкүмәт алмашқанлиқи сәвәблик қарар әмәлдин қалдурулди.