американиң афғанистандин чекиниши бихәтәрликкә тәсир йәткүзмәйду

түркийә авази радийоси хәвири: афғанистан пирезидентлиқ сарийиниң байанатчиси чаһансури американиң афғанистандин чекиниши тоғрисида йазма байанат елан қилди. у байанатида, афғанистан хәвпсизлик тармақлириниң афғанистан бихәтәрликигә мәсул болушни төт йерим йил бурун чәт әл қисимлиридин тапшурувалғанлиқини қәйт қилди.

у чәт әл қисимлириниң йиллардин буйан афғанистан хәвпсизлик қисимлириға тәлим-тәрбийә вә мәслиһәтчилик җәһәттин йардәм бәргәнликини әскәртип, бу сәвәбтин чәт әл қисимлириниң чекинишиниң бихәтәрликкә һечқандақ тәсир қилмайдиғанлиқини тәкитлиди.

у байанатта, афғанистан һөкүмити вә хәлқиниң ахирқи нишаниниң, хәвпсизлик қисимлириниң өз күчигә тайиниши вә земинини қоғдийалайдиған болуши икәнликини әскәртти.

у афғанистан мудапиә саһәсиниң вә хәвпсизлик тармақлириниң күнсери техиму күчәйгәнликини әскәртип, терроризмға зәрбә бериштә қолға кәлтүрүлгән мувәппәқийәтләрниң, буниң испати икәнликини қәйт қилди.

америка пирезиденти доналд трамп сүрийәдин кейин, афғанистандики 7 миң әскәрниңму чекинидиғанлиқини ейтқан иди.

америка таратқулириниң нам-шәрипини ашкарилимиған әмәлдарларниң ейтқанлиридин нәқил елип елан қилған хәвәрлиридә, пирезидент трампниң афғанистандики америка әскәрлириниң тәхминән йеримини чекиндүридиғанлиқи илгири сүрүлгән иди.

һазир афғанистанда американиң 14 миңдин артуқ әскири бар.