йилдирим: пәләстин хәлқиниң мустәқиллиқини халаймиз
түркийә бүйүк милләт мәҗлиси башлиқи бинали йилдирим пәләстин хәлқиниң әркинликкә еришиши вә мустәқил дөләткә игә болушини үмид қилидиғанлиқлирини ейтти.
түркийә авази радийоси хәвири: йилдирим, «қуддус пәләстинниң мәңгүлүк пайтәхти» темиси астида истанбулда өткүзүлгән парламентлар ара қуддус мунбириниң иккинчи нөвәтлик йиғини җәрйанида иштиракчиларниң шәрипигә берилгән зийапәттә қилған сөзидә, пәләстиндә тинчлиқ орнитишниң шәртлири һәққидә мәлумат берип мундақ деди: «пәләстиндә тинчлиқ орнитишниң алдинқи шәрти, 1967 – йили бәлгиләнгән чегра линийәлири даирисидә пайтәхти қуддус болған мустәқил, өз – өзигә хоҗа вә җуғрапийәлик бир пүтүнлүккә игә мустәқил пәләстин дөлитиниң қурулушидур. түркийә һәмишә пәләстинни қоллап кәлмәктә. пәләстинликләргә шундақ чақириқта болимәнки, силәр өзүңларниң тәқдирини өзүңлар бәлгилийәлишиңлар үчүн, алди билән, йеганә садаға айлинишиңлар керәк. бизниң бирдинбир арзуйимиз шуки, пәләстинлик қериндашлиримизниң вақитни чиң тутуп, һечқандақ бир шәртни оттуриға қоймастин тәкрар күчлирини бирләштүрүши, давалириға саһип чиқиш билән бир вақитта, мүрини мүригә тирәп , һәққаний күрәшлирини изчил давамлаштуруши лазим.»
