نىگېرىيەدە خولېرا تۈپەيلى 71 ئادەم قازا قىلدى

تۈركىيە ئاۋازى رادىيوسى خەۋىرى: نىگېرىيەنىڭ شەرقىي شىمالىدا مەيدانغا كەلگەن خولېرا يۇقۇملۇق كېسەللىكى تۈپەيلى 2 ئاي ئىچىدە ئۆلگەنلەرنىڭ سانى 71گە يەتتى.

دۇنيا سەھىيە تەشكىلاتى شەرقىي شىمال رايونى ۋەكىلى دوكتور كوللىنىس ئوۋىلى، يوبې ۋىلايىتىگە قاراشلىق 5 رايوندا 2 ئاي ئىچىدە 71 ئادەمنىڭ خولېرا تۈپەيلى ئۆلۈپ كەتكەنلىكىنى بىلدۈردى.

رايوندا 2 ئاي ئىچىدە 1759 خولېرا ۋەقەسى بايقالغانلىقىنى ئېيتقان دوكتور ئوۋىلى، يۇقۇملۇق كېسەللىكلەرنىڭ ئالدىنى ئېلىش ئۈچۈن ھەقسىز داۋالاش خىزمىتى باشلىغانلىقىنى ئەسكەرتتى.

نىگېرىيەنىڭ پاكىز سۇ يېتىشمەيۋاتقان رايونلىرىدا پات-پات خولېرا كېسەللىكى كۆرۈلۈپ تۇرىدۇ.

نىگېرىيەدە تېررورلۇق تەشكىلاتى بوكو ھارامنىڭ تېررورلۇق ھۇجۇملىرى تۈپەيلى يۇرت-ماكانلىرىدىن كۆچۈپ كېتىشكە مەجبۇر بولغانلار مۇساپىرلار لاگېرلىرىدا تۇرمۇش كەچۈرىدۇ.