вашингтон теһранға 12 шәртниң 6 - маддисини хатириләтти
америка ташқи ишлар министирлиқи, иран ембарголири даирисидә теһрандин тәләп қилған 12 шәртниң 6 – маддисини хатириләткән һалда, «иран түзүми ирақ һөкүмитиниң игилик һоқуқиға һөрмәт қилиши керәк» деди.
түркийә авази радийоси хәвири: америка ташқи ишлар министирлиқи, 4 – нойабирда иҗра қилинишқа башлинидиған иран ембарголири тоғрисида иҗтимаий таратқу тори тивиттердики адреси арқилиқ байанат берип, «ембарголарниң иҗра қилинишиға 6 күн қалғанда, мана бу иран түзүминиң нормал бир дөләттәк паалийәт елип бериши үчүн зөрүр болған 6 – шәрт: иран түзүми ирақ һөкүмитиниң игилик һоқуқиға һөрмәт қилиши, шиә қораллиқлириниң қорал ташлиши, тарқиветилиши вә қайтидин маслаштурулушиға йол қойуши лазим» дегән ибариләргә орун берилди.
министирлиқ, буниңдин илгири теһран даирилиригә 12 түрлүк шәрт қойған болуп, булар орундалмиған тәқдирдә, ембарголарниң бәлгиләнгән муддәттә иҗра қилинишқа башлинидиғанлиқини уқтурғаниди.
америка пирезиденти доналд трампниң, май ейида, иран билән 2015 – йили һасил қилинған йадро келишимидин чекингәнликини елан қилишидин кейин, ташқи ишлар министири майк помпейо дөлитиниң теһрандин орундишини тәләп қилған 12 түрлүк шәрт тоғрисида байанат берип, иранниң биринчи қәдәмдә нөвәттики вә буниңдин илгирики йадро қоралиға игә болушқа алақидар хизмәтлирини хәлқара атом енергийәси оргиниға мәлум қилиши вә еғир су реакторлири қатарлиқ уран ишләпчиқиришқа хатимә бериши керәкликини ейтқаниди.
министир помпейо, иранниң буниңдин илгирики келишимдә көрситилгинидәк, хәлқара атом енергийәси оргининиң иран тәвәликидики йадро муәссәсәлирини тәкшүрүшигә йол қойушини вә баллистик башқурулидиған бомба синақ қилишни тохтитишини؛ иранда қамақта йетиватқан америка пуқралириниң қойуп берилишини؛ иранниң ливан һизбуллаһи, һамас вә пәләстин исламий фиронти қатарлиқ «террорчи гуруппа» ларға йардәм қилишни тохтитишини؛ қошниси ирақниң земин мустәқиллиқиға һөрмәт қилишини؛ шиә қораллиқлириниң қорал ташлиши вә қайтидин маслаштурулуши лазимлиқини тәкитлигәниди.
йәмәндә болса, иранниң һусийларни қоллашни тохтитиши лазимлиқини әскәрткән майк помпейо, йәмәндә тинчлиқ мусаписиниң башлинишини тәләп қилғаниди.
у йәнә, иран инқилаб муһапизәтчилириниң қуддус күчлирини қоллашқа, исраилийә қатарлиқ барлиқ қошна дөләтләргә тәһдит селишқа хатимә беришини тәләп қилған, мәзкур шәртләр орундалмиған әһвалда, бу дөләткә тарихниң әң еғир ембарголириниң йүргүзүлидиғанлиқини илгири сүргәниди.
