сәуди әрәбистан шаһзадә сәлманниң җәмал кашикчи вәқәсидә мәсулийитиниң йоқлуқини билдүрди

түркийә авази радийоси хәвири: сәуди әрәбистан ташқи ишлар министири адил әлҗубәйр американиң фокс нийус (Fox News) қанилида байанат елан қилип, вәлиәһди шаһзадә муһәммәд бин сәлманниң журналст җәмал кашикчи җинайити һәққидә һечқандақ хәвириниң йоқлуқини, шундақла мәсулийитиниңму йоқлуқини илгири сүрди.

у журналист җәмал кашикчиниң өлүмидә исми тилға елинған кишиләр вәлиәһди шаһзадә бин сәлманға йеқин кишиләр туруп, бин сәлманниң вәқәдин қандақларчә хәвири болмайдиғанлиқи һәққидики соалға җаваб бәргәндә, бу кишиләрниң вәлиәһди шаһзадигә йеқин кишиләр әмәсликини илгири сүрди.

у: «вәлиәһди шаһзадә буларниң һәммисини рәт қилди. шаһзадиниң булардин хәвири йоқ. йуқири дәриҗилик истихбарат мәсуллириниңму хәвири йоқ. бу кишиләр аманлиқ мәсилилиригә қарайдиған нормал хәвпсизлик хадимлири иди. бу мәзкур кишиләрниң һоқуқ даирисидин һалқип кәткән һәрикәт болди. журналист җәмал кашикчини консулханида өлтүрүп хата қилди. улар қилмишини йошурушқа тиришти» деди.

сәуди әрәбистан ташқи ишлар министири әлҗубәйр 60 йашлиқ бир йазғучиниң 15 хәвпсизлик хадимиға қандақ қаршилиқ көрсәткәнлики һәққидә соралған соалға: «вәқә йүз бәргәндә 15 хәвпсизлик хадиминиң һәммисиниң консулханида икәнликигә ишәнмәймән. бу кишиләрни тәкшүрүватимиз, қандақларчә бир йәргә кәлгәнликлирини тәкшүрүватимиз» дәп җаваб бәрди.

әлҗубәйр: «бу наһайити чоң хаталиқ. аилисигә тәзийәмизни билдүрүватимиз, дәрт-әләмлиригә ортақлишимән. вәқәниң алди елинған болса бәк йахши болатти. немила дегән билән чоң хаталиқ өткүзүлди. вәқәниң җавабкарлириниң қаттиқ җазаға тартилидиғанлиқиға ишинимән» дәп җаваб бәрди.

у сәуди әрәбистан хәвпсизлик хадимлириниң өзигә җәмал кашикчиниң консулханидин чиқип кәткәнлики тоғрисида доклат берип хаталаштурғанлиқини илгири сүрүп, түркийәдин кәлгән мәлуматларниң әксичә болуши сәвәбидин дәрһал тәкшүрүшни башлиғанлиқлирини билдүрди.

у: «тәкшүрүш нәтиҗисидә журналист кашикчиниң консулханида өлтүрүлгәнликини ениқлидуқ. бирақ, қандақ өлтүрүлгәнликини вә җәсәтниң қәйәрдә икәнликини билмәймиз» деди.

 сәуди әрәбистан һөкүмити 2-өктәбир истанбулдики сәуқди әрәбистан консулханисиға киргәндин кейин йоқап кәткән журналист кашикчиниң «консулхана бинасида чиққан сүркилишләр нәтиҗисидә өлгәнлики» ни елан қилған иди.