lé kéchyang: soda urushigha teyyarmiz
xitay bash ministiri li kéchyang, amérika qoshma ishtatliri bilen diyalog ornitishqa tirishqanliqlirini, biraq soda urushighimu teyyar ikenliklirini éytti.
türkiye awazi radiyosi xewiri: xitay bash ministiri li kéchyang, dölitide ziyarette boluwatqan amérika palatasi heyitini kütüwalghanda söz qilip, «amérika qoshma ishtatliri bilen diyalog ornitishqa tirishiwatimiz, biraq soda urushighimu teyyarmiz» dédi.
li kéchyang xitay dölet téléwiziyesi teripidin tarqitilghan mezkur uchrishishta, amérikiliq palata ezalirigha, tramp rehberlik apparatining soda mesilisi toghrisida aqilane we mentiqiliq pozitsiyede bolushini, xitay bilen ortaq chare tépish üchün tirishchanliq körsitishini ümid qilidighanliqini eskertti.
li kéchyang xitay tereqqiyat aliy munbiride söz qilghandimu, döliti bilen amérika qoshma ishtatliri arisidiki soda munasiwetliri üstide toxtilip, bazar küchi we soda belgilimiliri sayisida bügünki soda hejimini qolgha keltürgenliklirini, buning négizide özara menpeet yetküzüsh we ortaq payda élishning yatidighanliqini éytti.
u, «soda urushida héchkimning ghelibe qazinalmaydighanliqi» ni tekitlep, sodidiki muwazinetszlikni muhakime qilghanda, normal shundaqla réal pozitsiyede bolushqa chaqirdi.
amérika qoshma ishtatliri pirézidénti donald tramp xitaygha tesir körsitidighan shekilde import qilinidighan polat we alminyumning tamozhna béjini östürgendin kéyin, xitayning 1300 ge yéqin mehsulatigha 60 milyard dollar etrapida tamozhna béji qoyulghan, emma béyjingning amérika qoshma ishtatliridiki sélinmilirigha cheklime qoymighanidi.
béyjingmu amérikining bu siyasitige qarshi amérikidin import qilinidighan mehsulatlardin 3 milyard dollar etrapida qoshumche tamozhna béji alidighanliqi élan qilghanidi.
amérika qoshma ishtatlirining eng köp soda qizil reqimi bar döletler arisida 2017 – yilliq sanliq melumatlargha qarighanda, 375 milyard dollar soda reqimi bilen xitay aldinqi qatardin orun alidu.
özara tashlanghan bu qedemlerdin kéyin, amérikiliq we xitayliq emeldarlarning soghuqchiliqni peseytish yolida perde arqisida uchrishish ötküzüwatqanliqi taratqulardin orun aldi.
wol sitriyt jurnal géziti, amérika qoshma ishtatlirining béyjinggha xitay bazirigha érishishini kücheytish teleplirini mezmun qilghan bir tizimlikni tapshurghanliqini, ikki dölet emeldarlirining jimjit halda halda sodilishishni bashlighanliqini yazdi.
ilgiri sürülishiche, mezkur söhbetler xitayning iqtisadqa mesul bash ministir yardemchisi liyu xé bilen amérika qoshma ishtatliri xezine ishliri ministiri stéw munchéin we amérika qoshma ishtatliri soda wekili robért laythizér teripidin élip bérilmaqta iken.
derweqe, li din ilgiri munchin xitay bilen söhbet ötküzüwatqanliqlirini bildürüp, «soda urushidin qorqmaymiz, emma, meqsitimiz bu emes» dégenidi.
