америка түркийә вә қатардики базилиридин айрилмайдиғанлиқини елан қилди
америка армийәси мәркизий қоманданлиқ иштаби (CENTCOM), американиң түркийәдики инҗирлик һава армийә базиси вә қатардики әл удәйд һава армийә базилиридин айрилидиғанлиқиға мунасивәтлик хәвәрләрниң тоғра әмәсликини елан қилди.
түркийә авази радийоси хәвири: америка армийәси мәркизий қоманданлиқ иштабиниң рәсмий твиттер бетидә һәмбәһирләнгән учурда: «америка түркийәдики инҗирлик һава армийә базисидин йаки қатардики әл удәйд һава армийә базисидин айрилмайду. бу һәқтики хәвәрләр хата вә асассиздур» дейилди.
охшаш вақитта, америка мәркизий һава армийәси қоманданлиқ иштаби (AFCENT) му рәсмий твиттер бетидә бу һәқтә учур һәмбәһирләп: «американиң түркийәдики инҗирлик һава армийәси вә қатардики әл удәйд һава армийә базисидин айрилидиғанлиқи илгири сүрүлгән хәвәрләрниң растлиқи нөл» деди.
һәмбәһирләнгән учурда йәнә мундақ дейилди:
«ортақ хәвпсизлик қайғулириға қарши күрәш қилиш үчүн бирликтә хизмәт қилишимиз керәк болған бир вақитта, бундақ зийанлиқ хәвәрләр райондики шерикләр арисида ишәнмәслик вә айрилишниң келип чиқишиға пайдилиқ.»
йеқинқи бир қанчә һәптидин буйан американиң инҗирлик һава армийә базисидин әскәрлирини чекиндүргәнлики тоғрисида хәвәрләр тарқиливатқан иди. буниңдин башқа, американиң қатардики әл удәйд һава армийә базисидики әскәр санини азайтқанлиқи тоғрисидики хәвәрләрниң тарқилиши билән, американиң бу икки базидин чекинидиғанлиқи илгири сүрүлгән иди.
америка дөләт мудапиә министирлиқи (бәш бурҗәклик бина, пентагон) американиң даешқа қарши һәрбий һәрикәтләрниң азийиши вә афғанистандики талибанға қарши һәрбий һәрикәтләрниң көпийиши сәвәбидин бәзи һәрбий қисимларниң афғанистанға әвәтилгәнликини билдүргән, әмма инҗирлик һава армийә базисидин чекинидиғанлиқиға мунасивәтлик хәвәрләрни кәскин рәт қилған иди.
