трамп келәр ай латин америка дөләтлирини зийарәт қилиду
америка пирезиденти доналд трамп келәр ай перу, коломбийә қатарлиқ латин америка дөләтлирини зийарәт қилиду.
түркийә авази радийоси хәвири: америка пирезиденти доналд трамп келәр ай латин америка дөләтлирини зийарәт қилиду.
ақ сарай тәрипидин бу һәқтә елан қилинған байанатта, пирезидент доналд трампниң латин америка зийаритини тунҗи болуп перудин башлайдиғанлиқи билдүрүлди.
байанатта доналд трампниң перуниң пайтәхти лимада 13-апрелдин 14-апрелғичә чақирилидиған «америкилиқлар йиғини»ға иштирак қилидиғанлиқи, арқидин перу пирезиденти педро пабло кукзийнски билән көрүшидиғанлиқи қәйт қилинди.
перудин кейин коломбийәгә өтидиған трампниң коломбийә пирезиденти җон мануел сантос биләнму көрүшидиғанлиқи әскәртилди.
байанатта трампниң перу вә коломбийә зийарәтлиридә америка билән латин америка дөләтлири арисидики иқтисадий, мәдәнийәт вә тарихи мунасивәтлирини күчәйтиш йолида ташлинидиған қәдәмләр үстидә музакирә өткүзүлидиғанлиқи, шундақла трампниң районниң бихәтәрликигә мунасивәтлик мәсилиләрниму күнтәртипкә елип келидиғанлиқи тәкитләнди.
бултур 20-йанварда пирезидент болған трамп мексика, перу вә чили қатарлиқ дөләтләрму әзаси болған тинч окйандин һалқиғанлар иттипақидин америкини чекиндүрүп чиқишни қарар қилди. трамп һакимийити йәнә америка, мексика вә канадаму әзаси болған шималий америка әркин сода келишиминиму қайтидин музакиригә қойидиғанлиқини җакарлиди.
буниңдин ташқири америка-мексика чеграсиға бихәтәрликни көздә тутуп там қопурушқа йолйуруқ чүшүргән трамп, мексика болуп барлиқ латин америка һөкүмәтлириниң наразилиқини қозғиди.
америкидики латин америкилиқ болуп йүз миңларчә көчмәнни чеградин қоғлап чиқиридиғанлиқини күнтәртипкә елип кәлгән трамп һакимийити, бу сәвәбтинму латин америкилиқларниң наразилиқиға учрап кәлмәктә.
