ройтерз, мухбирларниң дәрһал қойуп берилишини тәләп қилди
бирма һөкүмити назарәт астиға елинған журналистларни дәрһал қойуп беришкә чақирилди.
түркийә авази радийоси хәвири: әнглийәниң ройтерз хәвәр агентлиқи, бирма һөкүмитини йенида рәсмий материйалларниң көпәйтилгән нусхилири чиққандин кейин «дөләт мәхпийәтлики қануни» ға хилаплиқ қилиш билән әйиблинип назарәт астиға елинған икки хизмәтчисини қойуп беришкә чақирди.
ройтерз хәвәр агентлиқи башлиқи стефен җ.адлер бу һәқтә байанат берип, «ройтерз мухбирлири ва лон вә кйав сое оо, бирмада дунйави әһмийәткә игә вәқәләрни хәвәр қилип келивататти. (улар) хизмәтлири йүзисидин назарәт астиға елинди» деди вә әркин ахбаратқа қилинған бу очуқ – ашкара һуҗумдин күчлүк әндишә қиливатқанлиқини әскәртип, «алақидар тармақларни уларни дәрһал қойуп беришкә чақиримиз» дегәнләрни қәйт қилди.
бирма учур – ахбарат министирлиқи, мәзкур журналистларниң үстәлниң арқисида қоллириға кишән селинған һаләттики фото – сүрәтлириниму тарқатти.
бирмадики америка әлчиханисиму, ройтерз мухбирлириниң намувапиқ шәкилдә назарәт астиға елинишидин күчлүк әндишә қиливатқанлиқини билдүрди.
йәнә бир тәрәптин, бирма парламентиға йеқин җайда учар камера билән әтрапни сүрәткә алғанлиқи илгири сүрүлүп 27 – өктәбирдә назарәт астиға елинған лау хон-мең вә мок чой лин билән бирма пуқраси шопури вә йәрлик журналист ауң наиң-сое пайтәхт непидода сотланғаниди. TRT World қанили үчүн хизмәт қилидиған мәзкур 4 киши, 10 – нойабирда қанунсиз учар камера сақлиғанлиқи үчүн икки айлиқтин қамақ җазасиға һөкүм қилинғаниди.
һөкүм елан қилинип болғандин кейин, TRT World қанили мухбирлиридин иккиси башқа җинайәтләрни садир қилиш биләнму әйибләнгәниди.
бирма һөкүмитиниң армийә билән четишлиқ мәсилиләрдә әркин ахбаратқа бесим ишлитиватқанлиқи қәйт қилинмақта.
