трамп бәһрәйн тәхт вариси шаһзадисини қобул қилди
америка пирезиденти доналд трамп ақсарайда бәһрәйн тәхт вариси шаһзадиси сәлман бин һәмәд әлхәлифәни қобул қилди.
түркийә авази радийоси хәвири: америка пирезиденти трамп билән бәһрәйн тәхт вариси шаһзадиси әлхәлифәниң учришишида нуқтилиқ һалда икки дөләт иқтисадий вә сода мунасивәтлири муһакимә қилинди.
трамп учришиштин илгири мухбирларға қисқила байанат берип, бәһрәйн билән пат арида пәрқлиқ саһәләр бойичә 9 милйард долларлиқ сода келишими имзалайдиғанлиқлирини вә буниңдин наһайити хушал икәнликлирини билдүрди. у сөзини давамлаштуруп, «аримизда узунға созулған күчлүк мунасивәт бар, бу мунасивәт техиму йахшилиниду» дегәнләрни қәйт қилди.
бәһрәйн тәхт вариси шаһзадиси әлхәлифәму, америка зийаритиниң «интайин муһим бир зийарәт» икәнликини, икки дөләт арисида йүз йилға йеқин вақиттин буйан давамлишип келиватқан иттипақ вә хәлқләр ара достлуқ мунасивити барлиқини ейтти.
арқидин трамп билән әлхәлифә айрим учришиш өткүзүп, икки дөләт мунасивәтлири вә районға алақидар мәсилиләр тоғрисида сөзләшти.
бәһрәйн тәхт вариси шаһзадиси әлхәлифә түнүгүн америка ташқи ишлар министири рекс тиллерсон вә мудапиә министири җеймс маттис билән айрим – айрим көрүшкәниди.
