ши мавзедуңдин кейинки «әң күчлүк» рәһбәргә айланди
хитай рәиси ши җинпиң қурултай вәкиллириниң «ши җинпиң идийәси» ни низамнамәгә киргүзүшни қоллиши билән, мавзедуңдин кейинки «әң күчлүк» рәһбәргә айланди.
түркийә авази радийоси хәвири: хитай коммунистик партийәси дөләт рәиси ши җинпиңниң идийәсини қобул қилип, низамнамәгә киргүзүшни қол көтүрүп қобул қилди. нәтиҗидә, ши җинпиң мавзедуңға охшаш орунға чиққан болди. бундақ болғанда, ши җинпиңға қаритилған тәнқидләр, хитай коммунистик партийә һакимийитини тәнқидләш болуп һесаблиниду. қурултайниң ахирқи күнидә 2000 дин артуқ вәкил бейҗиңдики хәлқ чоң сарийида ши җинпиңниң идийәсини низамнамәгә киргүзүшкә қол көтүрүп аваз бәрди.
ши җинпиң 2012-йили коммунистик партийә мәркизий комитетиниң секритари болған болуп, шундин бери дөләт һакимийитидики орнини күчәйтип кәлгән иди. униң йеңи хитайчә алаһидиликкә игә сотсийализм идийәси 14 асасий пиринсиптин тәшкил тапиду. булар:
- партийә рәһбәрлириниң дөләттики барлиқ хизмәтләрдә биринчи рәһбәр болуши؛
- адәм мәркәзчилик идийәсини намайан қилиш؛
- кәң даирәлик ислаһатларни давамлаштуруш؛
- тәрәққийат үчүн йеңи нишан бәлгиләш؛
- хәлқниң һакимийәт ишлириға қатнишишиға кепиллик қилиш؛
- һакимийәтниң һәр бир органлириниң қанун рамкисида һәрикәт қилишиға кепиллик қилиш؛
- сотсийалистик асасий пиринсипларни қоғдаш؛
- хәлқниң турмуш сәвийәсини йуқири көртүрүш вә униңға капаләтлик қилиш؛
- тәбиий муһит билән адәм оттурисидики тәңпуңлуққа капаләтлик қилиш؛
- дөләт бихәтәрлики үчүн идийә бирликини күчәйтиш؛
- армийә ичидә партийә рәһбәрликиниң мутләқлиқини қоғдаш؛
- «бир дөләттә икки хил түзүм болуш» пиринсипини қоғдаш вә миллий иттипақлиқни күчәйтиш؛
- инсанийәт үчүн ортақ келәчәк бәрпа қилиш пикри һөкүмран болған җәмийәт бәрпа қилиш؛
- партийә рамкисида җанлиқ һакимийәт йүргүзүш؛
бәш йилда бир қетим өткүзүлидиған партийә қурултийи қобул қилған пилан бойичә, хитай коммунистик партийәси 2020- вә 2035-йиллири арисида сотсийалистик заманивийлаштурушниң тунҗи қәдимини әмәлгә ашуриду. кейинки 15 йиллиқ мәзгилдә болса, тәрәққий тапқан, күчлүк, демократик, заманиви мәдәнийәткә игә вә чирайлиқ сөзләр билән тәбир берилгән «улуғ заманиви сотсийалистик дөләт» кә айландурулиду.
