генерал дунфорд: хитай 2025-йилдин кейин америка үчүн чоң тәһдиткә айлиниду
америка армийә иштаб башлиқи генерал җосиф дунфорд иранниң 2015-йили алтә дөләт билән түзгән йадро келишимигә бойсунғанлиқини ейтти.
![генерал дунфорд: хитай 2025-йилдин кейин америка үчүн чоң тәһдиткә айлиниду](http://cdn.trt.net.tr/images/xlarge/rectangle/fc1c/1c8b/49ba/5996dbdee8436.jpg?time=1718730113)
түркийә авази радийоси хәвири: америка армийә иштаб башлиқи генерал дунфорд иккинчи қетим иштаб башлиқи болуп вәзипигә тәйинлиниш үчүн кеңәш палатасиниң хизмәтләр комитетида соалларға җаваб бәрди. у палатада соалларға бәргән йазмичә җавабида, теһран һөкүмитинң йадро келишимигә бойсунғанлиқини қәйт қилди.
у: «игилигән мәлуматлирим, иранниң келишим даирәсидә мәсулийитини ада қиливатқанлиқини көрситип бәрмәктә, бирақ келишим иранниң йадро қорали тәрәққий қилдуруш сүритини астилатқан болсиму, райондики йаман характерлик һәрикәтлирини өзгәртәлмиди» деди.
у өзиниң йазмичә бәргән җаваблири һәққидә соралған соалларға: «келишим, иран шәкилләндүргән бәш тәһдиттин пәқәт биригила хитаб қилиду. келишим өз ичигә алмиған тәһдитләр болса, башқурулидиған бомба, деңиздики тәһдитләр, иранниң сибәр һуҗумлири үчүн вастичиләрни қоллиши қатарлиқ тәһдитләрдур» дәп җаваб бәрди.
у иранниң башқа нурғун саһәләрдә йаман характерлик һәрикәтлирини давамлаштуруватқанлиқини, иранниң ирақ билән сүрийәдики тәсириниң күчәйгәнликини, йәмән билән ливанда болса, паал һәрикәт қиливатқанлиқини билдүрди.
у башқа соалларға: «шималий корейә һазир тинч окйан районида америка үчүн әң чоң тәһдит һесаблиниду, хитай 2025-йилдин кейин әң чоң тәһдиткә айлиниду» дәп җаваб бәрди.
у вашингтонниң һазирғичә пийоңйаң һөкүмитигә қарши дипломатик вә иқтисадий вастиләр арқилиқ бесим қиливатқанлиқини әскәртип: «һәрбий җәһәттә, шималий корейәгә қарши ташқи ишлар министири тиллерсон йетәкчилик қиливатқан бесим қилиш паалийәтлирини толуқ қоллашқа тәййармиз» деди.