трамп һоқуқидин елип ташлиниши мумкинму?
демократларниң авам палата әзаси брад шерман пирезидент доналд трампни һоқуқидин елип ташлаш тоғрисида конгрәгә тәләп сунди.
түркийә авази радийоси хәвири: америка калифорнийә иштатидин сайланған демократларниң авам палата әзаси брад шерман русийәниң 2016-йилдики пирезидентлиқ сайлимиға арилашқанлиқиға мунасивәтлик тәкшүрүшләр җәрйанида адаләткә тосқунлуқ қилғанлиқини илгири сүрүп, пирезидент доналд трампниң һоқуқидин елинишини мәзмун қилған бир тәләпни конгрәгә сунди.
шерман тәлипидә, доналд трампниң пирезидентлиқ сайлимида русийә билән мәхпий келишим түзгәнликигә мунасивәтлик тәкшүрүшләр башланғанда, федератсийә тәкшүрүш идариси (FBI) ниң сабиқ директори җеймес комини туйуқсиз вәзиписидин елип ташлиғанлиқини, адаләткә тосқунлуқ қилишқа четилидиған чоң җинайәт дәп көрсәтти.
у коминиң трампниң өзидин сабиқ миллий хәвпсизлик мәслиһәтчиси мишел флин һәққидики тәкшүрүшни әмәлдин қалдурушни тәләп қилғанлиқиға мунасивәтлик дәваларни хатириләткән һалда: «барлиқ бу әһвалларда доналд трамп пирезидент болуш сүпитидә ишәнч беришниң дәл әксичә, асасий қанунға тайанған һөкүмәтни йиқитидиған, қанун билән адаләтниң алий мәқситигә битәрәплимә қарайдиған вә америка хәлқини рәнҗитидиған позитсийәсини намайан қилмақта. бу сәвәбтин, доналд трамп җинайәтчи дәп қарилишиқа, сотқа тартилишқа вә һоқуқидин елинишқа лайиқтур» деди.
мәзкур тәләпниң конгрәдә тәстиқлиниши наһайити йирақ еһтималлиқ болсиму, рәсмий тәләп сүпитидә ройхәткә елиндиғанлиқи үчүн, бу һәқтә бесилған муһим қәдәм дәп қаралди.
шундақ қилип, пирезидент доналд трамп һәққидә һоқуқидин елип ташлашни мәзмун қилған тәләп рәсмий шәкилдә конгрәгә йәткүзүлгән болди, демократлар буниңға тәмкинлик билән муамилә қилди. бирақ, ақсарай қаттиқ инкас қаайтурди.
ақсарай байанатчиси сандерс: «буни пүтүнләй толиму күлкилик вә сийасий ойунниң әң начар шәкли болған қәдәм, дәп ойлаймән» деди.
шерманниң пирезидент доналд трампни һоқуқидин елип ташлаш тәлипини һазирғичә тексас иштатидин сайланған демократларниң авам палата әзаси ал грен қоллиди. шерманниң тәлипи аваз беришкә қойулмиди, әгәр авазға қойулса, җумһурийәтчиләр тәрипидин наһайити асанла рәт қилинидиғанлиқи пәрәз қилинмақта.
