б д т хәвпсизлик кеңиши җиддий топлиниду
әтә (22-май) б д т (бирләшкән дөләтләр тәшкилати) хәвпсизлик кеңишиниң шималий корейәниң ахирқи башқурулидиған бомба синиқи қилғанлиқи тоғрисида җиддий топлинидиғанлиқи билдүрүлди.
түркийә авази радийоси хәвири: б д т хәвпсизлик кеңиши әтә (22-май) шималий корейәниң ахирқи башқурулидиған бомба синиқи тоғрисида җиддий топлиниду.
дипломатик мәнбәләрдә қәйт қилинишичә, пийоңйаңниң йадро пирограммиси вә ахирқи башқурулидиған бомба синиқи ахбаратқа йепиқ шәкилдә музакирә қилинидикән.
җәнубий корейә түнүгүн (20-май) пийоңйаңниң йеңидин башқурулидиған бомба синиқи қилғанлиқини елан қилған болуп, буниңға қарита, америка, йапонийә вә җәнубий корейә хәвпсизлик кеңишидин топлинишни тәләп қилған иди.
җәнубий корейә армийә қоманданлиқ иштаби байанатида, шималий корейәниң җәнубий пийоңән шәһириниң пукчаң райониға йеқин җайдин «нами ениқ болмиған» бир башқурулидиған бомбини қойуп бәргәнликини билдүргән иди. байанатта, башқурулидиған бомбиниң тәхминән 500 километир учуп деңизға чүшкәнлики әскәртилгән иди.
шималий корейә башқурулидиған бомба қойуп бәргәнликини тоғрилиди вә «2-пукгуксоң» намлиқ оттура вә узун мусапилиқ балстик башқурулидиған бомбиларниң мувәппәқийәтлик һалда синақ қилинғанлиқини уқтурди.
б д т хәвпсизлик кеңиши йадро пирограммиси сәвәбидин шималий корейәгә 2006-йилдин буйан һәр хил һәрбий вә иқтисадий ембарголарни йүргүзүп кәлмәктә.
америка шималий корейәгә йүргүзүлүватқан ембарголарниң техиму еғирлаштурулушини тәләп қилиду. шималий корейә болса, балстик башқурулидиған бомба синақлириниң «өзини қоғдаш» ни мәқсәт қилидиғанлиқини илгири сүриду.
