австрийәдә йүз йөгәшни мәний қилиш рәсмий қанунлашти
австрийә парламенти, аммивий орунларда йүзниң тонуғили болмайдиған шәкилдә йөгилишини мәний қилишқа алақидар қанун лайиһәсини қобул қилди.
түркийә авази радийоси хәвири: австрийәниң мәзкур чәклимиси, өктәбир ейидин башлап иҗра қилинидикән. австрийә парламенти ахбарат ишханиси байанат берип, йеңи қанун лайиһәлири даирисидә оттуриға қойулған мәзкур қанун лайиһәсиниң, һөкүмәтни тәшкил қилған иҗтимаий демократлар партийәси билән австрийә хәлқ партийәсиниң қоллап беләт ташлиши билән парламентниң тәстиқидин өткәнликини билдүрди.
«өктәбир ейидин башлап, йүзниң һәрқандақ бир нәрсә билән тонуғили болмиғудәк дәриҗидә йөгилиши йаки йошурулушиға 150 йавроғичә иқтисадий җаза берилиду» дегән ибариләргә орун берилгән байанатта, чәклиминиң аммивий қатнаш васитилири, сот мәһкимиси, мәктәп вә университетлардиму иҗра қилинидиғанлиқи қәйт қилинди.
байанатта, чәклиминиң саламәтлик, тәнтәрбийә вә мәдәнийәткә алақидар сәвәбләр билән маска дегәндәк йүзни тонушқа тосалғу болидиған амилларни өз ичигә алмайдиғанлиқи тәкитләнди.
австрийәдики көплигән иҗтимаий күчләр башқурушидики орган вә қануншунас, «чайшап чәклимиси» дәп атиливатқан мәзкур қанунға наразилиқ билдүрмәктә.
байанатта йәнә, йеңи қанун лайиһәлири даирисидә мусапирларни өз ичигә алған чәт әлликләргә немисчидин башқа австрийә қиммәт – қарашлирини чүшәндүридиған курсларниң ечилидиғанлиқи қәйт қилинди. мәзкур қанун, ашқун пикирләрни мәзмун қилидиған китаб, журнал дегәндәк йазма учурларниң аммивий орунларда тарқитилишини чәкләшниму өз ичигә алидикән.
