исираилийәдә әзанни чәкләш тәклипи парламентта авазға қойулди

түркийә авази радийоси хәвири: исираилийә вә пәләстин таратқулирида исираилийә парламентидики әзанни чәкләш қанун лайиһәсигә беләт ташлашни мәзмун қилған син көрүнүши қайта-қайта тарқитилди. парламент омумий кеңишидики беләт ташлашта, исираилийә парламенти омумий кеңишидә әзанниң чәкләш һәққидики қанун тәклипи тоғрисида беләт ташлаш ахирлашқандин кейин, сөз қилған әрәб парламент әзаси әймән авдә қанун тәклипигә наразилиқ билдүрүп, қолидики қанун лайиһәсини йиртти. авдә кейинчә парламент омумий кеңишидин чиқириветилди.

авдәдин кейин, йәнә бир әрәб парламент әзаси әһмәт әттийби мунбәргә чиқип, сүрә бәқәрәниң 114-айитини оқуди вә парламенттики диндар йәһудийларни қанун тәклипини рәт қилишқа чақирди. у әзанниң исираилийәниң асаслиқ символлиридин бири икәнликини вә чәклигили болмайдиғанлиқини әскәртип, қолидики қанун тәклипини йиртип етивәткәндин кейин, мунбәрдин чүшти.

исираилийәдә әзанниң кәч саәт 23:00 дин әтигән саәт 07:00 арисида йаңратқуда оқулушини чәкләшни мәзмун қилған қанун тәклипи, парламент омумий кеңишидики биринчи қетимлиқ беләт ташлашта, 55 аваз билән қобул қилинған, 48 аваз билән рәт қилинған иди. тәклипиниң рәсмий қанун болуши вә иҗра қилиниши үчүн кеңәшниң икки қетимлиқ йиғилишида мақуллиниши керәк.