трамп иккинчи хизмәт күнидә енергийә пәрманлирини имзалиди

түркийә авази радийоси хәвири: америка пирезиденти доналд трамп ақсарайда хизмәт башлиған иккинчи күнидә енергийә сийасәтлири нуқтисидин «инқилаб» дәп баһа берилгән шималий дакота вә кийстон ексил нефит туруба йоллири үчүн пирезидентлиқ пәрманини имзалиди.

канададин америкиниң җәнубидики нефит айриш завутлириға хам нефит йәткүзүш пилан қилинған вә тәхминән 8 милйард доллар сәрп қилинидиған кийстон ексил туруба йоли лайиһәсини сабиқ пирезидент обама алтә йил тохтитип қойған. сабиқ пирезидент обама әйни вақитта, конгрә мәзкур лайиһәни тәстиқлиған болсиму үч қетим рәт қилған.

бир тәрәптин, тәхминән 3 милйард 700 милйон доллар хәҗлинидиған вә төт иштаттин өтидиған шималий дакота нефит туруба йолиға қарши наразилиқ намайишлири давам қилмақта.

қәйт қилинишичә, шималий дакота лайиһәси өтидиған йәрләр 19-әсирдә имзаланған келишим бойичә «стандиң рок сийукс» намлиқ һиндиан қәбилисигә тәвә болуп, мәзкур қәбилә 2016-йили авғуст ейида һөкүмәткә қарши сотқа әрз қилип, лайиһәни тохтитип қойған. 2016-йили өктәбир ейида болса, йуқири сот мәһкимиси лайиһәни әмәлдин қалдурған.

пирезидент доналд трамп йәнә, мәзкур лайиһәләргә мунасивәтлик муһит түзәш хизмәтлириниң сүритини тезләштүридиған пирезидентлиқ пәрманиниму имзалиди.

доналд трамп бүгүн (25-йанвар) мексика чеграсиға там соқуш қурулушини башлаш тоғрисида пәрман чүшүридиғанлиқиниму җакарлиди. у чикагодики зораванлиқ вәқәлири азаймиған тәқдирдә хәвпсизлик хадимлирини әвәтидиғанлиқини әскәртти. у келәр һәптә алий сот мәһкимисиниң сотчисини елан қилидиғанлиқиниму сөзлиригә илавә қилди.

доналд трамп 20-йанвар пирезидентлиқ вәзиписини тапшурувалғандин кейин, сайлам сәпәрвәрлик паалийәтлиридә вәдә бәргән сабиқ пирезидент обама йолға қойған сәһийә сийасәтлирини әмәлдин қалдурди.