шинзу аби: трамп биз ишинәләйдиған рәһбәр икән
йапонийә баш вәзири шинзу аби американиң 45-нөвәтлик пирезидентлиқиға сайланған доналд трамп билән көрүшкән тунҗи чәт дөләт рәһбири болуп қалди.
түркийә авази радийоси хәвири: йапонийә кйодо агентлиқи баш вәзир шинзу абиниң перуда өткүзүлидиған асийа-тинч окйан иқтисад бирлики (APEC) йиғиниға қатнишиштин бурун америкини зийарәт қилип, доналд трамп билән көрүшкәнликини хәвәр қилди.
баш вәзир шинзу аби трамп билән көрүшкәндин кейин елан қилған байанатида, йапонийә билән америка оттурисидики өзара ишәнч механизми үстигә қурулған мунасивәтләрни тәкитләп: «трамп билән өткүзүлгән айрим учришишимиз һәққидә тәпсилий мәлумат берәлмәймән. әмма, икки дөләт мунасивити өзара ишәнчкә тайиниду. дөләтләр арисида өзара ишәнч болмиса, мунасивәтләр илгирилимәйду. трампниң, биз ишинәләйдиған рәһбәр икәнликигә қайил болдум. биз йәнә мувапиқ бир вақитта көрүшимиз» деди.
доналд трамп фәйисбук арқилиқ: «баш вәзир шинзу аби өйүмгә кәлди, дост болуп қалдуқ, буниңдин мәмнунлуқ һес қилдим» дегән учурини һәмбәһирләшти.
шундақ қилип, баш вәзир шинзу аби техи вәзиписини тапшурувалмиған америка пирезиденти билән көрүшкән тунҗи чәт әл рәһбири болуп қалди.
бу җәрйанда, һәмминиң диққити трампниң америкини өз ичигә алған 12 дөләт имзалиған транс-тинч окйан шериклик келишимигә қандақ позитсийә тутидиғанлиқиға мәркәзләшти.
трамп сайлам мәзгилидә «һәммидин авал америка» дегән шоарни тәкитләп, икки айдин кейин вәзиписини өткүзүп беридиған пирезидент обама имзалиған TPP келишимидин чекинип чиқидиғанлиқини билдүргән иди.
америка кеңәш палатаси һазирчә TPP келишимини имзалимиди.
