йавропаға визисиз баридиғанларға шәрт қойушни мәзмун қилған лайиһә қобул қилинди
йавропа иттипақи комитети, йавропада визисиз сайаһәт қилидиғанларниң интернет арқилиқ илтимас сунушини шәрт қилған «сайаһәт учури вә рухсәт системиси» намлиқ йеңи бир лайиһәни қобул қилди.
түркийә авази радийоси хәвири: мәзкур йеңи лайиһәдә көрситилишичә, америка қошма иштатлириға охшаш виза әркин қойуветилгән дөләтләрдин йавропаға келидиғанлар, 2020- йилидин башлап интернет арқилиқ илтимас җәдвилини толдуридикән. кимлик учурлири, сайаһәт материйали, вақитлиқ туруш иҗазәтнамиси қатарлиқлар тоғрисидики соалларға җаваб берилидиған җәдвәл билән шәнгән (йавропа иттипақиға әза дөләтләр арисидики әркин сайаһәт қилиш келишимигә тәрәп болған дөләтләр) дөләтлиригә кириш үчүн рухсәт илтимаси сунулидикән.
җәдвәлдә йәнә йолучилардин йуқумлуқ кесилиниң бар – йоқлуқи, маарип сәвийәси вә кәспигә даир учурлар, илгири җазалинип җазаланмиғанлиқи, уруш районлириға барған бармиғанлиқиға даир соалларму сорилиду. һәр бир илтимас үчүн 5 йавро елиниду.
лайиһәниң қанунлишиши үчүн йавропа иттипақиға әза әлләр билән йавропа парламентиниң мақуллуқидин өтүши тәләп қилиниду. йавропа иттипақи комитети әмәлдарлири, бу усул арқилиқ һәрикәткә өтүш еһтимали бар террорчиларни йаки сайаһәтчи сүпитидә йавропа иттипақиға керип, арқидин панаһлиниш илтимаси сунушниң алдини елишниң пиланланғанлиқини билдүрди.
нөвәттә 50 дин артуқ дөләтниң пуқраси, шәнгән дөләтлиригә виза алмастин паспорт биләнла кирәләйду.
