һурмуз боғузида йеңидин иран – америка йирикчилики йүз бәрди
америка, иранниң төт хәвпсизлик кемисиниң бәсрә қолтуқида бир америка парахотиға дәхли қилғанлиқини елан қилди.
түркийә авази радийоси хәвири: америка мудапиә министирлиқиниң бир әмәлдари, иран инқилаб муһапизәтлириниң төт бихәтәрлик кемисиниң мәхсус ракетамийот йоқитип ташлиғучи USS нитзе намлиқ уруш парахотиға йуқири сүрәтлик кемиләр билән хәтәрлик һаләттә йеқинлашқанлиқини билдүрди.
америка уруш парахотиниң кемиләрни агаһландуруп һаваға 10 қетим оқ чиқарғанлиқини, агаһландуруш сигналиниң челинғанлиқии әскәрткән мәзкур әмәлдар, нитзе намлиқ уруш парахотиниң симсиз алақилишиш аппарати арқилиқ иран кемилири билән алақә орнитишқа урунғанлиқини қәйт қилди.
кемиләрниң иккисиниң агаһландурушларға писәнт қилмастин парахотқа 274 метир келидиған йәргичә сүритини астилатмастин йеқинлашқанлиқини тәкитлигән америка мудапиә министирлиқиниң мәзкур әмәлдари, нитзениң йөнилишини өзгәрткәнликини тилға елип өтти.
деңиз қисимлири һәрикәт башлиқи адмерал җон ричардсон, вәқәниң америка деңизларда дуч келиватқан риқабәтни әкс әттүрүп бәргәнликини вә теһран билән деңиздики сүркилишни кәлтүрүп чиқарғанлиқини илгири сүрди.
иран уруш парахотлири өткән йили декабир ейида һурмуз боғузиға йеқин җайда бомба синақ қилған болуп, қойуп берилгән бомбилар америка авиаматкиси USS һаррй с.труманниң 1370 метир йирақлиқиға чүшкәниди. иран армийәси бу иш йүз берип аридин бир ай өткәндин кейин йәнә мәзкур авиаматкиниң үстидин қоралсиз учқучисиз һава аппаратини учуртқаниди.
иран, 12 – йанварда бәсрә қолтуқидики фарси арилиға йеқин бир җайда америка деңиз армийәсиниң икки кемиси билән униңдин бири айал җәмий 10 әскәрни иран деңиз тәвәликигә қанунсиз киргәнликини илгири сүрүп тутувалған, аридин бир күн өткәндин кейин иран деңиз тәвәликигә қәстән кирмигәнлики қәйт қилинип қойуп берилгәниди.
