әнглийә хәлқиниң қарари баш вәзирни вәзиписидин истепа беришкә мәҗбур қилди

түркийә авази радийоси хәвири: кемирин қарардин кейин әнглийәниң йавропа иттипақидин чиқип кетишигә мунасивәтлик лисбон келишиминиң 50 – маддисини дәрһал иҗра қилиш нийити йоқлуқини қәйт қилди, өктәбирдә вәзиписидин истепа беридиғанлиқини, шу вақитқа қәдәр йеңи рәһбәрниң бекитилиши лазимлиқини тәкитләп мундақ деди: «хәлқниң ирадисигә һөрмәт қилиш керәк. дөлитимизни йеңи мәнзилгаһиға йәткүзидиған бир йол башчи сүпитидә қелишим тоғра әмәс.»

әнглийәниң йавропа иттипақидин чиқип кетиш музакирилирини йеңи лидер билән елип бериш лазимлиқини қәйт қилған кемирин һакимийәт бешидики муһапизикар партийәниң өктәбирдә чақирилидиған қурултийида йеңи лидерни җүмлидин йеңи баш вәзирни сайлап чиқиши керәкликини тәкитлиди, әнглийәдә йашаватқан йавропалиқлар вә йавропада йашаватқан инглизлар үчүн қисқа вақит ичидә һечқандақ өзгириш болмайдиғанлиқини билдүрди.

әнглийәдә өткүзүлгән тарихий реферандумда дәсләпки рәсмий мәлуматларға қариғанда, % 51.9 хәлқ әнглийәниң йавропа иттипақидин чиқип кетиши үчүн беләт ташлиған.

мутәхәссисләрниң қаришичә, бу қарар әнглийәниң иқтисадий җәһәттин бир мәзгил бир изда тохтап қелишиға сәвәб болидикән.

реферандум нәтиҗилири тоғрулуқ дәсләпки инкасларму келишкә башлиди. реферандумдин кейин әнглийә мәркәз банкиси муқимлиқни сақлаш үчүн керәклик барлиқ тәдбирләрни елишқа тәййар икәнликини җакарлиди. реферандум нәтиҗиси елан қилғандин кейин, америка қошма иштатлири пирезиденти барак обамаға бу һәқтики өзгиришләр вә буниңдин кейинки нәтиҗилири һәққидә доклат сунулди. обаманиң бүгүн әнгилийә баш вәзири дәйвид кемирин билән көрүшүши күтүлмәктә.

мөлчәрлинишичә, хәлқниң йавропа иттипақидин чиқип кетиш қарари дәрһал иҗра қилинмайдикән. әнглийәниң йавропа иттипақидин чиқип кетиши үчүн 2 йилдин 10 йилғичә вақит кетидикән.

әнглийә хәлқиниң йавропа иттипақидин чиқип кетиш қараридин кейин, германийә йавропа иттипақини қурған 6 дөләтни шәнбә күни ташқи ишлар министирлири сәвийәсидә җиддий йиғин өткүзүшкә чақирди.