нетанйаһу-чипрас достлуқи күчәймәктә
исраилийә билән гиретсийә нурғун саһәдә келишим имзалиди.
түркийә авази радийоси хәвири: гиретсийә баш министири алексис чипрас исраилийәдә зийарәттә болмақта.
чипрас зийарәт даирисидә исраилийә баш министири бунйамин нетанйаһу билән көрүшти.
2-нөвәтлик исраилийә-гиретсийә алий дәриҗиликләр һәмкарлиқ кеңишигә иштирак қилған икки баш министир нурғун саһәдә келишимләр имзалиди.
көрүшүштин кейин өткүзүлгән мухбирларни күтүвелиш йиғинида икки рәһбәр исраилийә билән гиретсийә һөкүмәтлириниң районда келип чиққан мәсилиләрни дадиллиқ билән һәл қилишқа тәййар икәнликлирини билдүрүшти.
чипрас нетанйаһу билән өткүзгән сөһбитиниң толиму әһмийәтлик вә оңушлуқ өткәнликини ейтип, исраилийә ширкәтлирини гиретсийәгә мәбләғ селишқа чақирди.
нетанйаһу икки дөләт оттурисидики һәмкарлиқниң бир нәччә йил кечип кәткәнликини бирақ һәр икки дөләттә һәмкарлиқ сүритиниң тезлишидиғанлиқини ейтти.
түркийә-исраилийә мунасивәтлири үстидә тохталған нетанйаһу икки дөләт мунасивәтлириниң әслигә келиши үчүн тиришчанлиқ көрситиливатқанлиқини әскәртти.
2-нөвәтлик алий дәриҗиликләр һәмкарлиқ кеңишигә иштирак қилған чипрас билән нетанйаһу сайаһәтчилик, җамаәт хәвпсизлики, енергийә, су вә депломатик тәлим-тәрбийәгә охшаш саһәләрдә һәмкарлиқ келишимлири имзалиди.
