германийәдә көчмәнләрниң қиммәтлик буйумлири мусадирә қилиниду

түркийә авази радийоси хәвири: баварийә иштатиниң ички ишлар министири җочим һерман көчмәнләргә қарита йолға қойулған бәлгилимиләр тоғрисида «билд гезити» дә байанат елан қилди. у: «иштатимиздики бәлгилимә вә көчмәнләргә берилидиған йардәмләргә мунасивәтлик қарарлар шивейтсарийәниң бәлгилимилиригә охшайду. көчмәнләр лагерларға тизимлитиш үчүн кәлгәндә, һөҗҗәт, қиммәтлик буйумлири вә нәқ пуллириниң бар – йоқлуқи тәкшүрүлиду» деди. у қиммәтлик буйумлар вә 750 йавродин көп нәқ пулниң мусадирә қилинидиғанлиқи үстидә алаһидә тохталди.

баден – вүртемберг иштатида болса, сақчилар көчмәнләрдә 350 йавродин көп нәқ пул бар болса мусадирә қилалайду. бу бәлгилимә, көчмәнләрниң дөләт йардимини алмастин, алди билән, өзиниң мал – мүлкини хәҗлишини тәләп қилиду.

германийә көчмәнлик вә маслаштуруш ишлириға мәсул дөләт министири айдан өзоғуз: «германийәдә панаһлиниш үчүн илтимас қиған киши, алди билән өзиниң пули вә мал – мүлкини хәҗлиши керәк. бу бәлгилимә көчмән аилиләрниң зибу – зиннәт буйумлириниму өз ичигә алиду» деди.

данийә һөкүмити тәрипидин түзүлгән бәлгилимидә, көчмәнләрниң 10 миң крон (1340 йавро) дин артуқ пул вә қиммәтлик буйумлири мусадирә қилиниду. йәни, сақчилар баһаси 10 миң крондин артуқ саәт, йанфон вә компийутерларни мусадирә қилалайду.

данийә һөкүмити, бу чарә арқилиқ көчмәнләр хираҗитиниң бир қисминиң қамдилидиғанлиқини илгири сүрди. бу бәлгилимә келәр һәптә данийә парламентида авазға қойулиду.