FBI كومپىيۇتېر ئېنژىنېرىنىڭ ئىزىغا چۈشتى

تۈركىيە ئاۋازى رادىيوسى خەۋىرى: ئامېرىكا مەركىزى ئاخبارات تەشكىلاتى FBI، ئىراق شام ئىسلام دۆلىتىنىڭ سېپىگە قېتىلغانلىقى ئىلگىرى سۈرۈلۈۋاتقان بىر كومپىيۇتېر ئېنژىنېرىنىڭ ئىزىغا چۈشتى.
FBI، 33 ياشلىق ئەھمەد ئەبۇ سەمرا ھەققىدە ئۇچۇر يەتكۈزگۈچىلەرگە 50 مىڭ دوللار مۇكاپات بېرىلىدىغانلىقىنى ئۇقتۇردى. تېگى سۈرىيەلىك ئەھمەد ئەبۇ سەمرانىڭ بوستوندا تۇرۇشلۇق بىر دوختۇرنىڭ بالىسى ئىكەنلىكى، كومپىيۇتېر كەسپىدە ئوقۇغانلىقى، 2006 - يىلى ئوقۇشنى تاشلاپ يەمەن ۋە پاكىستاندىكى ئەل قائىدە لاگېرلىرىدىكى تەلىم - تەربىيەلەرگە ئىشتىراك قىلغانلىقى بىلدۈرۈلدى.
FBI، ئەبۇ سەمرانىڭ ئايالى ۋە بالىسى بىلەن بىرلىكتە سۈرىيەنىڭ ھەلەپ شەھىرىدىكى ئىراق شام ئىسلام دۆلىتى بازىسىدا تۇرۇۋاتقانلىقىنى، تەشكىلاتنىڭ ئىجتىمائىي ئاخبارات ئىشلىرىنىڭ مەسئۇلى ئىكەنلىكىنى تەخمىن قىلماقتا.
ئامېرىكا دائىرىلىرىنىڭ قارىشىچە، ئىراق ۋە سۈرىيەدىكى ئىراق شام ئىسلام دۆلىتىنىڭ سېپىدە 100 دىن ئارتۇق ئامېرىكىلىق بار ئىكەن.