обама: ирақтики йеқинқи өзгиришләрдин әндишә қиливатимән

түркийә авази радийоси хәвири: америка қошма иштатлири пирезиденти барак обама, ирақтики йеқинқи өзгиришләрдин қаттиқ әндишә қиливатқанлиқини ейтти.
обама, америкиниң бихәтәрлик мәнпәәтлири тәһдиткә учриған тәқдирдә, һәрбий мудахилә қилишқа тәййар икәнликлирини әскәртип мундақ деди: «исйанчиларға қарши күрәш мәсилисидә ирақ һөкүмитигә һәр җәһәттин йардәм бериштин қилчә айанмаймән.»
ирақта һәрбий җәһәттин әң қисқа вақит ичидә һәрикәткә өтүшниң зөрүрлүкини тәкитлигән обама, америка даирилириниң барлиқ еһтималларни ойлишип көргәнликини қәйт қилди.
обаманиң байанатидин кейинла ақ сарайму, «ираққа қуруқлуқ һуҗуми елип бериш үчүн әскәр әвәтиш пиланимиз йоқ. буниң сиртидики барлиқ еһтималлар музакирә қилиниватиду» тәриқисидә байанат елан қилди.
америка қошма иштатлири дипломатийә министири җон кери, ирақтики йеқинқи өзгиришләрдин қаттиқ әндишә қиливатқанлиқини җакарлиди.
йәнә бир тәрәптин, америка қошма иштатлири муавин пирезиденти җо байдин, ирақ баш министири нури әл малики билән телефон арқилиқ көрүшти.
байдин учришишта, вашингитонниң радикал унсурларға қарши күрәштә ирақ билән бирликтә һәрикәт қилидиғанлиқлирини тәкитлиди.
байдин, вашингитонниң ирақ һөкүмитигә бихәтәрлик җәһәттин берип келиватқан йардәмни тезләштүрүш вә даирисини техиму кеңәйтишкә тәййарлиниватқанлиқини қәйт қилди.
америка қошма иштатлири дипломатийә министирликиниң байанатчиси йен писакиму ирақ армийәсини тәнқид қилди.
писаки, ирақ армийәсиниң кәркүк билән мусулни тәрк әткәнликини әскәртип мундақ деди: «йеқинқи күнләрдин буйанқи вәқәләр агаһландуруш сигналлири бәрмәктә. қариғанда, ирақ армийәси қурулмилиқ җәһәттин аҗизлишишқа башлиғандәк қилиду. бир қисим бихәтәрлик күчлириниң ташлиған қәдәмлири вә инкаслиридин толиму үмидсизлиниватимиз, әмма ираққа йардәм бериш вәдимиз узақ мәзгиллик пиланни өз ичигә алиду.»