یوکرین کی فوج کے میزائل حملوں کے نتیجے میں 63 روسی فوجی ہلاک

روسی وزارت دفاع نے اعلان کیا ہے کہ یوکرین کی فوج کے میزائل حملوں کے نتیجے میں ماکیوکا کے قریب 63 روسی فوجی مارے گئے ہیں۔

روسی وزارت دفاع کے ترجمان ایگور کوناشینکوف نے 24 فروری سے جاری یوکرین کی جنگ میں روسی فوج کی کارروائیوں کے بارے میں بیان  جاری کیا ہے۔

انہوں نے کہا کہ  یوکرین کی فوج نے ڈونیٹسک کے علاقے میں مکئیوکا بستی کے قریب روسی مسلح افواج کی عارضی پوزیشنوں میں سے ایک پر حملہ کیاہے۔

 کوناشینکوف نے بتایا کہ امریکی ساختہ HIMARS ملٹیپل راکٹ لانچر سسٹم سے داغے گئے 6 میزائلوں میں سے 2 روسی فضائیہ   کے دفاعی نظام کی زد میں آ گئے۔

انہوں نے کہا کہ 4 انتہائی تباہ کن راکٹ ہیڈز کے پھٹنے کے نتیجے میں، عارضی تعیناتی پوائنٹ کے ایک حصے میں 63 روسی فوجی ہلاک ہو گئے ہیں۔

یوکرین میں روسی فوجی یونٹوں کی کارروائیوں کو جاری رکھتے ہوئے کوناشینکوف نے کہا کہ روسی فضائیہ کے انتہائی درست ہتھیاروں کے حملوں کے نتیجے میں یوکرینی فوج کے لیے کام کرنے والے 70 سے زائد غیر ملکی کرائے کے جنگجو ووں  کو ہلاک کردیا گیا ہے۔

انہوں نے کہا کہ  ڈونیٹسک کے علاقے، اور خرکیو کے علاقے میں نوووسینوو بستی میں کئی ایک یوکرینی فوجی زخمی بھی ہوئے ہیں۔  

یوکرین کی مسلح افواج کے دفتر برائے سٹریٹیجک کمیونیکیشن کی طرف سے جاری کردہ بیان میں دعویٰ کیا گیا کہ روسی فوج کے زیر کنٹرول شہر ماکیوکا میں بیرک کے طور پر استعمال ہونے والے ایک مرکز پر حملے کے نتیجے میں تقریباً 400 روسی فوجی مارے گئے۔