کینسر کی تشخیص کا نیا اور کار آمد طریقہ دریافت

انسانی جسم میں کینسر کی تشخیص کا نیا طریقہ دریافت کر لیا گیا ہے۔

انگلینڈ کی آکسفورڈ یونیورسٹی کے سائنسدانوں نے ایک خون کا ٹیسٹ تیار کیا ہے جو مریض کے خون میں میٹابولائٹس نامی کیمیکلز کی پیمائش کر سکتا ہے۔

یہ ٹیسٹ خون میں میٹابولائٹس کی پیمائش کے لیے مقناطیسی میدانوں اور ریڈیو لہروں کا استعمال کرتا ہے اورانسانی جسم میں کینسر کی موجودگی اور اس کے پھیلاؤ کا تعین ہوتا ہے۔

محققین نے وضاحت کی کہ یہ ٹیسٹ کینسر کی متعدد اقسام کا پتہ لگا سکتا ہے اور غیر مخصوص علامات والے مریضوں میں بھی کینسر کی موجودگی کی نشاندہی میں معاون ثابت ہو سکتا ہے۔

سائنسدانوں کا کہنا ہے کہ چونکہ یہ ٹیسٹ سبک رفتار اور سستا ہے، لہذا اس سے کینسر کی جلد تشخیص میں حائل رکاوٹیں دور ہو جائیں گی۔