کورونا وباء نے ٹرکش کولون کو دنیا بھر میں مشہور کر دیا

کورونا وائرس وباء کے دوران ٹرکش کولون کو پوری دنیا میں شہرت حاصل ہوئی ہے اور حالیہ مہینوں میں اسکینڈی نیویائی ممالک سے موصول ہونے والی بھاری طلب کو پورا کرنے کے لئے ترکی کے ضلع ایدرنے میں واقع کولون فرم پیریژا نے اپنے اوقات کار کو بڑھا کر 24 گھنٹے کر دیا ہے۔

فرم کے برآمداتی امور کے ذمہ دار براق سُو سیسی نے جاری کردہ بیان میں کہا ہے کہ "ہمیں فن لینڈ سے بھاری طلب موصول ہو رہی ہے۔ عام جراثیم کُش سے مختلف ہونے کی وجہ سے فن لینڈ میں ٹرکش کولون کی مانگ بڑھ رہی ہے۔ خاص طور پر سُپر مارکیٹوں کے داخلی حصوں اور ریستورانوں میں رکھنے کے لئے ٹرکش کولون کی طلب میں سنجیدہ سطح پر اضافہ ہوا ہے"۔

واضح رہے کہ وباء کے دوران وائرس سے بچاو کے لئے ماہرین کے، ماسک، سماجی فاصلے کے ساتھ ساتھ جراثیم کش محلول یا پھر کولون کے استعمال کا مشورہ دینے کے بعد سے خاص طور پر کولون کے ساتھ دلچسپی بڑھ گئی ہے۔

ضلع ایدرنے کے صنعتی زون میں قائم ترکی کی سب سے معتبر کاسمیٹک اور کولون فرم پیریژا کو امریکہ، آسٹریلیا، یورپ اور ایشیائی ممالک کے بعد اب اسکینڈی نیویائی ممالک میں سے خاص طور پر شمالی یورپی ممالک، فن لینڈ، ناروے، سویڈن اور ڈنمارک جیسے ممالک سے بڑے پیمانے کے آرڈر مِل رہے ہیں۔