آزاد کشمیر میں نئے وزیر اعظم کا انتخابی عمل انتشار کا شکار

وزیراعظم آزاد کشمیر کے انتخاب کے معاملے پر حکمراں جماعت پاکستان تحریک انصاف میں پھوٹ پڑنے سے  وزارت عظمیٰ کے لیے کسی نام پر اتفاقِ رائے قائم نہ ہو سکا۔

ذرائع کے مطابق ناراض اراکین نے مرکزی قیادت کے فیصلوں کے خلاف بغاوت کر دی ہے اور  اپوزیشن سے رابطے شروع کردیے ہیں۔ بیرسٹر سلطان اور تنویر الیاس گروپ میں مذاکرات ناکامی سے دوچار ہو گئے ہیں اور  وزراتِ عظمیٰ سے پیچھے ہٹنے کو کوئی بھی تیار نہیں۔

حکمران جماعت کے 3 دھڑوں کی جانب سے 5 امیدوار میدان میں ہیں، پی ٹی آئی نے چوہدری رشید کو وزارت عظمی کا امیدوار نامزد کیا ہے جبکہ اپوزیشن کی جانب سے پیپلزپارٹی کے چوہدری یاسین کو نامزد کیا گیا ہے۔

واضح رہے کہ اسمبلی میں وزیراعظم کے انتخاب کے لیے سادہ اکثریت یعنی 27ووٹ درکار ہیں۔  سیاسی  ماہرین نے دعویٰ  کیا ہے کہ پاکستان تحریک انصاف میں پھوٹ   حزب اختلاف کے لیے سود مند ثابت ہو سکتی  ہے۔  ذرائع کے مطابق فارورڈ بلاک اور بیرسٹر سلطان گروپ نے اپوزیشن سے وزارت عظمیٰ کی صورت میں مشروط تعاون کی پیشکش کر دی۔

آج سہ پہر 2بجے قانون ساز اسمبلی کا اجلاس طلب کیا گیا ہے، جس میں وزیر اعظم کے عہدے کے لیے انتخاب کا امکان ہے۔ اپوزیشن نے 30 اراکین کی حمایت کا دعویٰ کیا ہے جب کہ  پی ٹی اراکین کی مدد کے بغیر حکومت سازی نہیں جا سکتی ۔

واضح رہے کہ آئین کے تحت وزیر اعظم کے عہدے پر فوری طور پر انتخاب ضروری ہے۔