پی آئی اے کا مسافر طیارہ گر کر تباہ

حویلیاں کے قریب پہاڑی علاقے میں چترال سے اسلام آباد جانے والا پی آئی اے کا مسافر طیارہ گر کر تباہ ہوگیا ہے۔

چترال سے اسلام آباد جانے والا پی آئی اے کا مسافر طیارہ پی کے 661 ایبٹ آباد میں حویلیاں کے قریب گر کر تباہ ہوگیا ہے، طیارے کے انجن میں خرابی کے باعث حادثہ پیش آیا جب کہ پی آئی اے کا طیارہ پی کے 661 کو 4 بج کر 40 منٹ پر اسلام آباد لینڈ کرنا تھا تاہم اسلام آباد پہنچنے سے کچھ دیر پہلے ہی طیارے کا ایئرکنٹرول سے رابطہ منقطع ہوگیا تھا۔

دوسری جانب ڈپٹی کمشنر ایبٹ آباد نے اس بات کی تصدیق کرتے ہوئے کہا کہ مسافر طیارہ حویلیاں کے قریب پہاڑ سے ٹکرانے کے بعد گر کر تباہ ہوا۔ آئی ایس پی آر کے مطابق آرمی ہیلی کاپٹر اور فوجی دستے جائے حادثہ پر روانہ ہوگئے ہیں۔

ادھر ترجمان پی آئی اے نے حادثے کی تصدیق کرتے ہوئے کہا کہ طیارے میں عملے سمیت 40 افراد سوار تھے۔

طیارے میں سابقہ گلوکار جنید جمشید بھی طیارے میں سوار تھے اور ڈپٹی کمشنر عمر وڑائچ بھی مسافروں میں شامل تھے۔

حادثے میں طیارے میں سوار کسی بھی فرد کے زندہ بچنے کی امید معدوم ہو چکی ہے اور عینی شاہدوں کے مطابق طیارے میں ابھی تک آگ لگی ہوئی ہے۔ ایمرجنسی رسپانس سینٹر بھی قائم کردیا گیا ہے۔ وزیرداخلہ کی ریسکیو اداروں کو فوری اقدامات کی ہدایت کی ہے۔

دوسری جانب عینی شاہدین کے مطابق طیارے کو پہاڑ سے ٹکرانے کے بعد گرتے ہوئے دیکھا جس کے بعد آگ کے شعلے بلند ہوئے اور طیارہ مکمل طور پر جل کر راکھ ہوگیا۔