تحریک انصاف کو یکم مئی کے جلسے کی اجازت نہیں مل سکی
اگر تحریک انصاف چیئر کراس پر ہی جلسہ کرنے پربضد ہے تو ہمیں بھی کوئی اعتراض نہیں ہے، لیکن اسے اپنی سیکیورٹی کی ذمہ داری خود اٹھانی ہو گی
اطلاع کے مطابق لاہور کی مقامی انتظامیہ نے پاکستان تحریک انصاف کو چیئرنگ کراس پر یکم مئی کو جلسے کی اجازت دینے سے دو ٹوک انکار کردیا ہے۔
جلسے کے حوالے سے مقامی انتظامیہ اور تحریک انصاف کے رہنماؤں کے درمیان مذاکرات کا سلسلہ بغیر کسی نتیجے کے ختم ہو گیا ہے۔
مقامی انتظامیہ کا کہنا ہے کہ وزارت داخلہ کی رپورٹ کے مطابق پاکستان تحریک انصاف کے رہنماؤں کو شدید سیکیورٹی خدشات لاحق ہیں اس لئے گنجان آباد علاقہ ہونے کی وجہ سے پی ٹی آئی کو چیئرنگ کراس پر جلسے کی کسی صورت اجازت نہیں دی جا سکتی۔
دوسری جانب پاکستان تحریک انصاف کے رہنماؤں کا کہنا تھا کہ چیرمین عمران خان واضح طور پر کہہ چکے ہیں کہ جلسہ ہمارا جمہوری حق ہے اور سیکیورٹی فراہم کرنا مقامی انتظامیہ کی ذمہ داری ہے، ہم ہر صورت چیئرنگ کراس پر ہی جلسہ کریں گے۔
ادھر ڈی آئی جی آپریشنز ڈاکٹر حیدر اشرف نے کہا ہے کہ اگر تحریک انصاف چیئر کراس پر ہی جلسہ کرنے پربضد ہے تو ہمیں بھی کوئی اعتراض نہیں ہے، لیکن اسے اپنی سیکیورٹی کی ذمہ داری خود اٹھانی ہو گی۔
