ارمڑ میں پولیس کیساتھ جھڑپ، دو پولیس اہلکارہلاک

پشاور کے علاقے ارمڑ کے علاقے باغبانان میں اشتہاریوں کی موجودگی کی اطلاع پر پولیس نے سرچ آپریشن کیا ۔پولیس کے مطابق ایک گھر میں چھپے اشتہاریوں نے اچانک پولیس پر فائرنگ کردی جس سے دو پولیس اہلکار موقع پر دم توڑ گئے جبکہ ایک زخمی اہلکار ہسپتال پہنچ کر دم توڑگیا ۔چھ اہلکار زخمی بھی ہوئے ہیں ۔ پولیس نے علاقے کو گھیرے میں لے لیا ۔ ایس ایس پی آپریشنز میاں سعید کے مطابق پولیس کی جوابی کارروائی میں ایک اشتہاری بھی مارا گیا ۔ زخمی پولیس اہلکاروں کو لیڈی ریڈنگ ہسپتال منتقل کر دیا گیا ہے جہاں ایک اہلکار کی حالت تشویشناک بتائی جا رہی ہے ۔ دوسری طرف واقعے کے خلاف گاؤں کے لوگوں میں اشتعال پھیل گیا اور انہوں نے اُرمڑ تھانے کے سامنے احتجاج شروع کردیا ۔ مقامی لوگوں نے الزام لگایا کہ پولیس نے اشتہاری کے بجائے مقامی شخص کو مقابلے میں ہلاک کیا ہے ۔ علاقے میں حالات کشیدہ ہوگئے جس کے بعد پولیس کی مزید نفری طلب کرلی گئی ہے ۔