فلسطینی صدر اچانک سعودی عرب پہنچ گئے،شاہ سلمان سے ملاقات

 فلسطینی صدر محمود عباس، شاہ سلمان اور ان کے بیٹے سے اہم ملاقات کے لیے ایک اچانک دورے پر سعودی عرب پہنچ گئے ہیں۔

 خبر رساں  ایجنسی وفا کے مطابق، فلسطینی صدر نے  شاہ سلمان اور ولی عہد محمد بن سلمان سے ملاقات کی۔

بتایا گیاہے کہ  اس ملاقات میں مبینہ طور پر ایران اور اس کے حماس کے ساتھ تعلقات پر بات چیت کی جائے گی۔

 ممکنہ طور پر اس بات پر بھی تبادلہ خیال کیا جائے گا کہ کس طرح ایران اور حماس کے تعلق کو کمزور بنایا جا سکتا ہے۔

واضح رہے کہ دو بڑی فلسطینی تنظیموں الفتح اور حماس نے بارہ اکتوبر کو مصر کے دارالحکومت قاہرہ میں ایک مصالحتی معاہدے پر اتفاق کیا تھاجس کا مقصد مغربی اردن اور غزہ  کی پٹی میں ایک متحدہ حکومت کا قیام ممکن بنانا ہے۔

طے پانے والے معاہدے کے  تحت، یکم دسمبر سے محمود عباس کی حکومت غزہ پٹی کا کنٹرول سنبھال لے گی۔

فلسطینی صدر سے پہلے سعد حریری بھی سعودی عرب پہنچے تھے جنہوں نے گزشتہ ہفتے  اچانک یہ کہتے ہوئے استعفیٰ دے دیا تھا کہ اُن کی جان کو خطرہ ہے۔