قطرنے سعودی عرب کے مطالبات کا جواب دے دیا،مدت میں 48 گھنٹے کی مزید توسیع

قطر نے سعودی عرب اور اتحادیوں کے مطالبات کا جواب دے دیا جبکہ سعودی اتحادیوں نے قطر کو اپنے تحفظات پر غور کے لیے دیے گئے مدت میں مزید 48 گھنٹے کا توسیع کا اعلان کردیا۔

خبر کے مطابق قطر نے سعودی عرب اور اتحادیوں کے مطالبات کا جواب دے دیا ہےتاہم قطر کے جواب کی تفصیلات تاحال سامنے نہیں آئیں لیکن ایک عہدیدار نے بتایا کہ قطری وزیرخارجہ شیخ محمد بن عبدالرحمن الجاسم الثانی نے کویت کا مختصر دورہ کیا جو اس معاملے پر ثالث کا کردار ادا کررہا ہے۔

واضح رہے کہ سعودی عرب،متحدہ عرب امارات، بحرین اور مصر کی جانب سے 22 جون کو 13 مطالبات پیش کرتے ہوئے 2 جولائی کی مہلت  دی تھی تاہم انھوں نے گزشتہ پیر کو  اس میں  مزید طول دینے کا اعلان کیا۔

عرب ممالک نے قطر سے اخوان المسلمون کی معاونت نہ کرنے، ٹی وی چینل الجزیرہ کو بند کرنے، ایران سے تعلقات ختم کرنے اور ملک سے ترکی کے  فوجی اڈے  کو ختم کرنے سمیت 13 مطالبات کیے تھے۔

یاد رہے کہ سعودی عرب اور اس کے اتحادی عرب ممالک نے 5 جون کو قطر پر دہشت گردوں کی معاونت کا الزام دیتے ہوئے سفارتی تعلقات منقطع کرنے کا اعلان کیا تھا جس کےبعد خطے میں سفارتی بحران پیدا ہوگیا تھا۔

دوسری جانب قطر نے دہشت گردوں کی معاونت کے الزامات کو سختی سے مسترد کردیا تھا ۔