داعش کے سینیئر رہنما ابو محمد ال عدنانی حلب میں ہلاک ہوگئے ہیں ، نیوز ایجنسی اعماق

داعش کےسینیئر رہنما ابو محمد ال عدنانی شام کے شہرحلب میں امریکی فضائی کاروائی میں ہلاک ہوگئے ہیں۔

امریکی محکمہ دفاع کے مطابق شام کے شہر حلب میں اتحادی فضائی کاروائی کے دوران شدت پسند گروپ داعش کے سینیئر رہنماؤں میں سے ایک کو نشانہ بنایا گیا۔ ابھی اس حملے میں حاصل کئے گئے اہداف کا جائزہ لیا جارہا ہے اس لئے اس میں کسی اہم رہنما کی ہلاکت کی تصدیق نہیں کی جاسکتی تاہم اس سے داعش کو بہت بڑا دھچکا پہنچا ہے۔

دوسری جانب داعش سے منسلک نیوز ایجنسی اعماق نے اس کاروائی میں ابو محمد العدنانی کی ہلاکت کی تصدیق کردی ہے۔ ایجنسی کے مطابق ابو محمد عدنانی حلب کے خلاف جاری فوجی کاروائیوں کو پسپا کرنے کے دوران شہید ہوئے ہیں ۔بیان میں یہ نہیں بتایا گیا کہ عدنانی کی ہلاکت کیسے ہوئی تاہم ایک امریکی اہلکار نے  بتایا  ہے کہ امریکہ نے منگل کو حلب میں کیے جانے والے ایک فضائی حملے میں دولتِ اسلامیہ کے ’سینئیر رہنما‘ کو نشانہ بنایا ہے۔

 خیال رہے کہ عدنانی مغربی ممالک کے خلاف سخت موقف رکھتے تھے۔انھیں یورپ اور دوسرے مقامات پر حملوں کا ماسٹر مائنڈ بھی کہا جاتا تھا۔امریکہ نے عدنانی کے سر کی قیمت 50 لاکھ ڈالر مقرر کی تھی۔عدنانی نے مئی میں ایک آڈیو پیغام میں مسلمانوں سے مغربی ممالک میں حملے کرنے کی اپیل کی تھی۔

39 سالہ ابو محمد عدنانی دولتِ اسلامیہ کے سینئیر ترین اور اس کے لیے طویل عرصے تک کام کرنے والے رہنما تھے۔