فوجی افسر کا تنازعہ:امریکی وزیر دفاع نے بحریہ کے سربراہ کوبر طرف کر دیا

امریکہ کے وزیرِ دفاع مارک ایسپر نے عراق میں تعینات  فوجی افسر کے تنازع پر بحری سربراہ  رچرڈ اسپنسر کو عہدے سے ہٹا دیا ہے۔

امریکی نیوی افسر  ایڈورڈ گلیگر کو داعش کے 17 سالہ نہتے قیدی کو قتل کرنے اور اس کی لاش کے ساتھ تصاویر بنانے کے مقدمے کا سامنا تھا۔

وزیرِ دفاع مارک ایسپر کا کہنا ہے کہ بحریہ کے  سربراہ اپنا اعتماد کھو چکے ہیں کیونکہ انہوں نے ذاتی طور پر وائٹ ہاؤس سے رابطہ کیا ہے۔

امریکہ کی بحریہ نے کارروائی کے بعد  ایڈورڈ گلیگر کو تمام الزامات سے بری کیا اور گزشتہ ہفتے اُنہیں لاش کے ساتھ تصویر بنانے کے جرم میں ان کے عہدے میں تنزلی کر دی تھی۔

بحری   افسر  کے خلاف محکمہ جاتی کارروائی پر امریکی صدر ڈونلڈ ٹرمپ بھی کھل کر سامنے آئے اور انہوں نے ایڈورڈ گلیگر کو گزشتہ ہفتے دوبارہ عہدے پر بحال کر دیا تھا۔

صدر ٹرمپ نے  گزشتہ جمعرات کو اپنے ایک ٹوئٹ میں کہا  تھا کہ ہماری بحریہ  جنگی ہیرو ایڈورڈ گلیگر کو عہدے سے  نہیں ہٹا سکتی۔

امریکی محکمہ دفاع کے ترجمان جوناتھن ہاف مین نے اپنے ایک بیان میں کہا ہے کہ  اسپینسر نے وائٹ ہاؤس کو ذاتی تجاویز پیش کیں جس کا انہوں نے وزیرِ دفاع کے ساتھ تبادلہ نہیں کیا تھا۔