Sankt-Peterburgda “Türkmenistan-Beýik Ýüpek ýolunyň ýüregi” atly fotosuratlar sergisi guraldy

22-nji maýda “Russiýa-meniň taryhym” Taryhy seýilgähinde Türkmenistanyň Prezidenti Gurbanguly Berdimuhamedowyň “Türkmenistan- Ýüpek Ýolunyň ýüregi” kitaby bilen tanyşdyrylyş we adybir fotosuratlar sergisiniň dabapaly açylyşy boldy. 

Dabara Sankt-Peterburgyň Milletara gatnaşyklar boýunça komitetiniň başlygynyň orunbasary Wadim Okruşko, Sankt-Peterburgyň baş müftisi, Sankt-Peterburgyň Daşary gatnaşyklar boýunça boýunça komitetiniň we Milletler öýüniň işgärleri, şäheriň milli-medeni birleşikleriniň ýolbaşçylary, bu ýerde ýaşaýan türkmenleriň wekilleri, talyplar we ýaşlar birleşikleriniň işjeňleri, alymlar we sungat işgärleri gatnaşdylar. 

“Türkmenistan-Ýüpek Ýolunyň ýüregi” fotosuratlar sergisi Türkmenistanyň Prezidenti Gurbanguly Berdimuhamedowyň ýurduň özboluşly taryhy-medeni mirasyny, arheologik we tebigy gözelliklerini, uly möçberli gazananlaryny, syýahatçylyk mümkinçiligini, türkmen halkynyň baý däp-dessurlaryny dünýä wagyz etmek boýunça konsepsiýasyny beýan edýär. 

Fotosuratçylaryň işleriniň 80-si Türkmenistandaky dürli eýýamlara degişli özboluşly arheologiýa ýadygärliklerine, orta asyr binagärleriniň guran ajaýyp binalaryna syn etmäge, ýurduň tebigy gözellikleri barada düşünjelerini baýlaşdyrmaga, inçebil ahal-teke bedewleriniň owadanlygyna, dünýä belli türkmen halylarynyň we zergärlerimiziň eserleriniň nepisligine mynasyp baha bermäge, ak mermere bürenen Aşgabadyň sazlaşykly binalarynda jemlenen özgertmeleriň joşgunly depginlerini görmäge mümkinçilik berdi. Toýlardan, sadak bermäge taýýarlyklardan pursatlar, milli baýramlar ýaly däp-dessurlar hem fotosuratlarda öz beýanyny tapdy. 

“Mekan” Türkmen medeni jemgyýetiniň ýolbaşçysy sergini geçirmek üçin ajaýyp meýdança berendigine minnetdarlyk hökmünde Taryhy seýilgähiň direksiýasynyň başlygyna nakgaş Wladimir Artykowyň “Hojanepes Pýotr I-iňkide” suratynyň nusgasyny gowşuryp, Türkmenistan bilen Newa boýundaky şäheriň arasynda ynsanperwer gatnaşyklary işjeňleşdirmegiň wajyplygyny nygtady. 

Bu ýerde bolan konsertde Beýik Ýüpek ýolunyň geçen ýurtlarynyň we sebitleriniň folklor kompozisiýalary görkezildi. Sankt-Peterburgdaky türkmen talyplarynyň “Bagtyýarlyk” jemgyýetiniň işjeňleri baýramyň myhmanlaryny bagşylarymyzyň sungaty bilen tanyşdyrdylar. 

Çäräni Sankt-Peterburgyň milletara gatnaşyklary we migrasiýa syýasatyny durmuşa geçirmek boýunça komitetniň, “Sankt-Peterburgyň Milletler öýüniň, “Russiýa-meniň taryhym” Taryhy seýilgähiniň goldamagynda dünýä türkmenleriniň ynsanperwer birleşmesiniň Sankt-Peterburg we Russiýanyň Demirgazyk-Günbatary bölüminiň- Sankt-Peterburgyň “Mekan” Türkmen medeni jemgyýeti we “Golaý Gündogar” Medeni merkezi gurady. (TDH)