Gazagystanyň Türkiýedäki Ilçisi Abzal Saparbekuly, TRT-niň Baş Müdüri Ibrahim Eren Bilen Duşuşdy

Gazagystanyň Türkiýedäki Adatdan daşary we Doly ygtyýarly ilçisi Abzal Saparbekuly, Türkiýäniň Radio-telewideniýe guramasynyň TRT-niň Dolanşyk geňeşiniň başlygy we Baş müdüri Ibrahim Eren bilen duşuşdy.

Paýtagt Ankarada ýerleşýän TRT-niň merkezi binasynda bolan duşuşykda, Gazagystanyň we Türkiýäniň liderleriniň arasyndaky ýakyn we ynamdar gatnaşyklaryň iki ýurduň arasynda syýasy, bilim, söwda, ykdysadyýet we maýa goýum ugurlarynda edilýän gatnaşyklaryň ösmegine itergi berýändigine ünsi çeken ilçi Saparbekuly, geljekde iki ýurduň arasynda medeni taýdan edilýän hyzmatdaşlygyň pugtalanjakdygyna ynanýandygyny belledi.

Duşuşykda, geljekde medianyň goldaw bermeginde bilelikde medeni taslamalaryň durmuşa geçirilmegi meselesi ara alnyp maslahatlaşyldy.

Medeni taslamalaryň arasynda TRT Çojuk (Çaga) kanalynda ýaýlyma berilýän multfilmleriň gazak diline terjime edilip Gazagystanda ýaýlyma berilmegi hem ýer alýar.

Ilçi Saparbekuly, şuňa meňzeş taslamalaryň iki doganlyk ýurduň arasyndaky medeni we ruhy bagyň has-da güýçlenmeginde esasy rol oýnajakdygyny belledi.

TRT-niň Baş müdüri Ibrahim Eren hem iki ýurduň arasyndaky medeni gatnaşyklara goldaw bermäge dowam etjekdiklerini aýtdy.

Taraplar Gazagystanyň garaşsyzlygynyň 30 ýyllygyna bagyşlanyp bir ýylyň dowamynda dürli çäreleriň geçirilmegi we dokumental filmiň surata düşürilmegi meselesinde ylalaşyk gazandy.

Bu meselede TRT-niň Baş müdürligi bilen Gazagystanyň ilçihanasynyň taýarlyklara başlajakdygy bellenildi.